От олуттуг кызыл Аът чылы ниитизи-биле оожум эртер. Ооң мурнунда салдынган сорулгаларны чедип алырынга кончуг таарымчалыг үе дээрзин астрологтар демдеглеп турар.
Ынчалза-даа чаа 2026 чылда материалдыг таланы кол сорулга кылбазы чугула. Астрологтарның демдеглеп турары-биле алырга, бодун болгаш иштики делегейин сайзырадыр дээш, долгандыр бүгү-ле амылыгларже сагыш салып, делегейге эки чүүлдер кылыр дээш, кызып ажылдап чоруур кижилер эң-не улуг деткимчени алыр.
Те (22.12 – 20.01)
2026 чыл Телерге план ёзугаар сайзыраар үе. Базым санай арга-дуржулга болгаш бодамчалыг санаашкыннар олардан негеттинер. От олуттуг кызыл Аът чылында сөөлгү 10 чыл дургузунда күжениишкинниг кылып келген ажылының түңнелдерин олар көөр аргалыг.
Январь, февраль айларда дугуржулгаларын эде көөр, келир үеде сорулгаларны тодаргайлаар, чидиг эвес апарган айтырыглардан ойталаар болза эки.
Бир эвес эң-не кол деп санаары чүүлче кичээнгей салыр болза, чылдың бирги чартыында көскү түңнелдерни алыр.
Чазын ажылынга ат-алдары бедиир. Телерден кижилер болганчок дуза дилеп кээр. Нарын айтырыгларны таныыр кижилериниң ачызында дүргени-биле шиитпирлеп шыдаптар.
Чаа чүүлдерге өөренир азы анаа эвес шиитпирлеп дилеп тывар аргалар ажыттынар. Түңнелинде чай эгезинде орулгазы көвүдээр. Ажылдап алган акшазын кайы хамаанчок чарывайн, турум чүүлдерже киирерин астрологтар сүмелеп турар.
Күзүн чуртталга бир өскерлир. Саң-хөө талазы-биле аргаларны болгаш ажылдың хемчээлин эде көөр азы ажылын солуур күзел тыптыр. Сонуургалы эрте берген чүүлдерни сагыш-сеткилинден салыптар болза, чаа-чаа аргалар тыптыр.
Саң-хөө талазынга доктаамал өзүлде болур. Чыл эгезинде оваарымчалыг болуру чугула. Чазын туружу чоорту быжыгар болгаш чайын, күзүн улуг өскерлиишкиннер манап турар. Чедиишкин чедип алырынга эң-не кол чүүлдерге бодамчалыы, айыылдыг чүүлдерни сайгарып билири, үр үениң инвестицияларынга белени хамааржыр.
Суг-Саарар (21.01 – 19.02)
2026 чыл Суг-саарарларга аажок күштүг иштики эде тургустунуушкун болгаш дидим шиитпирлер кылыр үе. От олуттуг кызыл Аът чылында олар өскелерниң бодалын дыңнаарын соксаткаш, бодунуң бодалдары-биле шимченип эгелээр.
Чыл эгезинде чаа билиглерже болгаш арга-дуржулгаже чүткүлдүг апаар. Январь, февраль айларда үнелиг деп санаар чүүлдерин эде көөр. Оларның хууда өзүлдезинге чүү шаптыктап турарын хөй-ле Суг-саарарлар билип кааш, олардан ойталап кааптар.
Шак ындыг бот-сайгарылганың баштайгы түңнелдери чазын көскү апаар. Олар сорук кирип, солун бодалдары дөмей үзел-бодалдыг кижилерни тып алырынга дүрген дузалаар.
Ылаңгыя башкылаашкын болгаш блогинг адырында Суг-Саарарларга кончуг чедиишкинниг болур.
Март, июнь, декабрь айлар – эң-не хөй орулгалыг болур. Манавааны чүүлдерден акша-хөреңги кирер чадавас. Ынчалза-даа алган орулгазын бодунуң өөредилгезинче, кадыкшылынче, ажылының талазы-биле чаа чүүлдер өөренип алырынче киирери чугула.
Балыктар (20.02 – 20.03)
2026 чылда Балыктарга чажыт күштерин оттурар, шагдагы бодалдарын боттандырар үе болур. От олуттуг кызыл Аът чылы шиитпирлиг болурун негеп келир. Ол күзелдерин боттандырарынга идиг болур.
Чылдың бирги чартыында Балыктар боттарының кажан-даа бодавааны салым-чаяанын тып алыр чадавас азы уттундурган чогаадыкчы төлевилелдеринче эглип келир.
Балыктар чайын орулгазынче арганы эде көөр азы ынак ажылындан акша ажылдап алыр арга тып алыр. Күзүн улуг хемчээлдиг чаа төлевилелдер келир. Чыл төнчүзүнде бодунуң тергиидекчи шынарларын көргүзер аргалыг болур.
2026 чылда Балыктар саң-хөө талазынче бодамчалыг көөр апаар. Кайы хамаанчок чарыгдалдардан ойталаарын астрологтар сүмелеп турар. Оон башка өре-ширеже кире бээри мыяда.
(Уланчылыг).
/ Чыжыргана СААЯ белеткээн.
Чуруктарны интернеттен хоолгалаан.
“Шын” №50 2025 чылдың декабрь 25