Россия Федерациязының Президентизиниң чанында Уругнуң эрге-ажыктарының талазы-биле бүрүн эргелиг төлээ Мария Львова-Белова Тывага ажыл-агыйжы сургакчылаашкын-биле июль 18-те чораан. Бедик албан-дужаалдыг аалчыны Кызылдың аэропортунга Тываның Баштыңы Вячеслав Ховалыг, Уругнуң эрге-ажыктарының талазы-биле Тывада бүрүн эргелиг төлээ Саида Сеңгии болгаш өске-даа удуртукчулар уткаан.
Бичии уругларның республика эмнелгези, Кызыл хоорайда Өг-бүлеге болгаш ажы-төлге социал дуза төвү, назы четпээн уругларның социал-реабилитация төвү, республиканың уругларга социал дуза төвү «Сайзырал» дээш өске-даа социал албан черлериниң ажыл-чорудулгазы-биле Мария Львова-Белова июль 18-те таныжып көрген.
Ооң соонда Тываның Чазаанга Россияның Президентизиниң чанында Уругнуң эрге-ажыктарының талазы-биле бүрүн эргелиг төлээ Мария Львова-Белова сайгарылга түңнел хуралды эрттирген. Хуралга Тываның Баштыңы Владислав Ховалыг, Уругнуң эрге-ажыктарының талазы-биле Тывада бүрүн эргелиг төлээ Саида Сеңгии дээш республикада ажы-төлге болгаш оларның өг-бүлелеринге социал дуза болгаш хоойлу-чурум камгалалының албан черлериниң удуртукчулары киришкен.
Сайгарылга хуралдың соонда Мария Львова-Белова республиканың массалыг информация чепсектериниң журналистеринге кыска интервьюну берген. Уругларның эрге-ажыктарын камгалаар ажыл Тывада багай эвес дээрзин ол демдеглээш, чамдык четпестер барын айыткан. Ада-иелериниң буруузу-биле социал байдалы таарымчалыг эвес уруглар, оолдарның өг-бүлелеринге хамаарылганы өскертир херек деп чугаалаан. Ындыг өг-бүлелерде уруг-дарыгның ада-иелеринге административтиг хемчеглер онаар, торгаар дээн хевирлиг хемчеглерден, аргалыг-ла болза, чайлаарын сүмелээн. Ажы-төлүнге таарымчалыг эвес социал байдалды тургузуп турар ада-иелерге арагалаар чоруктан хоорлур, ажылдаарының аргаларын оларга дилеп тып, «сыырткыышты» тутсуру чугула деп, Мария Львова-Белова чугаалап, Тывада ажы-төлдүң социал байдалын экижидер талазы-биле федералдыг болгаш тус чер социал албан черлериниң кады ажылдажылгазы эки түңнелдерлиг болурунуң байдалдары бар деп демдеглээн.
Россияның Президентизиниң чанында Уругнуң эрге-ажыктарының талазы-биле бүрүн эргелиг төлээниң дузазы-биле республикада ажы-төлдүң социал байдалын экижидер ажыл эки түңнелдерлиг болурунга бүзүрелин Тываның Баштыңы Владислав Ховалыг илереткен. Владислав Ховалыг биле Мария Львова-Белова «Губернаторлар школазынга» кады өөренип чораан дугайында медээлер социал четкилерде көстүп келгилээн. Ындыг байдал база ажыл-херекке чогумчалыг салдарлыг болур чыгыы.
«Ажы-төлдүң эрге-ажыы дээш демниг ажылдаарынга регионнуң удуртукчузу боду хууда улуг сонуургалдыы кончуг эки-дир» — деп, Мария Львова-Белова массалыг информация ажылдакчыларынга чугаалаан.
Ш. МОНГУШ.
Буян ООРЖАКТЫҢ тырттырган чуруу.
"Шын" №54 2024 чылдың июль 20