Төөгүлүг болуушкун.

Тываның Баштыңы Владислав Ховалыг дүүн, сентябрь 30-де, Москва хоорайга Донецк, Луганск Улус Республикалар база Запорожье, Херсон областарга болуп эрткен референдумнарның түңнелдери-биле Россия Федерациязының составынче ук девискээрлерниң бактаап кирериниң дугайында дугуржулгаларга ат салган байырлыл езулалга киришкен.

“Донецк, Луганск, Запорожье, Херсон ам бис-биле кады – деп, В. Ховалыг бодунуң блогунга бижээн. – Чаныш сыныш чок, дүжүп бербээн чон бодунуң сөзүн чугаалаан. Владимир Путин оларның дугайында муң-муң чылдар-биле санаттынар чаңгыс аай төөгүлүг ороукту эрткен чаңгыс салым-чолдуг болганындан олар Россияга ынакшылын чылдар өттүр эккелгени бо деп кончуг шын чугаалады. Бистиң Дээди кол командылакчывыс Киев режимин от адарын соксаткаш, чугаалажылга, дугуржулга столунуң артынче эглип келиринче кыйгырган. Ук хоозураан девискээрлерни катап тургузар талазы-биле планнарының дугайында чугаалап берди. Россияның шак мындыг хостакчы хүлээлгези турда, коллективчи Барыын чүк чүнү-даа чедип албас дээрзинге бүзүрээр мен”.

Тываның Баштыңы ук девискээрлерниң Россияга каттыжар дээн шиитпирин Тываның чурттакчы чонунуң деткип, чылыы-биле хүлээп алганын демдеглээн. Россияда каттыжып келген чаа регионнарның чурттакчы чону төөгүлүг Төрээн чуртунче эглип келгенин “Саур-Могила” деп мемориалдыг комплекске байырлыг концерт-биле демдеглээн. Россияның Президентизиниң чугаазын олар адыш часкаашкыннары-биле уткуп алганнар.

“Донбасстың, Запорожье биле Херсоннуң чону боттарының бодал-сөзүн илеретти. Ону Киевтиң база ооң Барыын чүкте ээлериниң кичээп дыңнаарын күзээр-дир мен. Дөрт регионнуң чоннары ам мөңгеде бистиң хамаатыларывыс болган!” – деп, Владимир Путин байырлыг езулал үезинде чарлаан.

Төөгүлүг байырлыг хемчегге Тываның Баштыңы Владислав Ховалыгдан аңгыда, Күрүне Думазының Даргазының оралакчызы Шолбан Кара-оол, сенаторлар Людмила Нарусова, Дина Оюн болгаш Күрүне Думазының депутады Айдың Сарыглар киришкен.

Бистиң корр.