“Россияның эрге-ажыктарынга чөрүштүр төөгүнү мегелеп өскертир шенээшкиннерге удур Россия Федерациязының Президентизиниң чанында комиссия дугайында” Чарлыкты Россияның Президентизи Владимир Путин 2009 чылдың май 15-те үндүрген. Россия Федерациязынга төөгү талазы-биле күрүне политиказының үндезинин бодунуң Чарлыы-биле Президент доктааткан.
Россияның эрге-ажыктарынга чөрүштүр төөгүнү мегелеп өскертир шенээшкиннерге удур РФ-тиң Президентизиниң чанында комиссия Россияда төөгү чырыдыышкынын контрольдаар болгаш ооң түңнелдериниң дугайында чылдың-на күрүнениң баштыңынга илеткээр ужурлуг. Россияның Президентизиниң шиитпири-биле Россияда төөгү чырыдыышкынының айтырыгларын РФ-тиң Айыыл чок чорук чөвүлелиниң болгаш Күрүне чөвүлелиниң хуралдарынга сайгарып болур.
Тыва Республиканың националдар херектериниң талазы-биле агентилелдиң эгелээшкини-биле “Төөгүнү мегелеп өскертир шенээшкиннерниң болгаш даштыкы идеологтуг доктриналарның салдарының айтырыглары” темага “төгерик стол” Тываның гуманитарлыг болгаш тускай социал-экономиктиг шинчилелдер институдунга декабрь 6-да болуп эрткен. “Төгерик столдуң” ажылынга эртемденнер, күрүнениң эрге-чагырга органнарының харыысалгалыг албан-дужаалдыг ажылдакчылары киришкен.
Эртемденнер В.Д. Март-оол, Н.М.Моллеров, У.П. Бичелдей, А.А. Асонычев олар Россияның болгаш Тываның эрткен үезиниң төөгүзүн болгаш амгы үеде болуушкуннарны карартыр көргүзер, мегелеп өскертир таварылгалар барын чугаалааннар.
Россияның эрткен болгаш амгы төөгүзүн мегелеп өскертип көргүзер шенелделер эң ылаңгыя интернетте барын, оларны чогуур органнар хайгаарап турарын Тыва Республиканың националдар херектериниң талазы-биле агентилелдиң директорунуң албан-хүлээлгезин күүседип турар А.В. Калзан сагындыргаш, эң ылаңгыя Тыва, Якутия, Бурятия дээш өске-даа регионнарга хамаарыштыр Россия-биле эп-найыралдыг эвес күрүнелерден даштыкы идеологияның медээлеринде меге чүүлдер барын дыңнаткан. Тываның Баштыңының администрациязының болгаш ТР-ниң Чазааның аппарадының Информация политиказының департаментизиниң начальниги А.Н. Королева Россияның болгаш Тываның төөгүзүн чырыдарда, кончуг оваарымчалыг болурун чугаалааш, шын болгаш меге медээлерни ылгап сайгарарының чугулазын демдеглээн.
Төөгүнү болгаш амгы үениң болуушкуннарын эң ылаңгыя интернетке боттарыныы-биле хөөредип, каастап чырыдар “төөгүчүлерниң” көвүдээни, Россияга удур даштыкы идеология күштелгени-биле холбаштыр херек кырында шын төөгүнү өскертир, харын-даа мырыңай мегелеп нептередир чорукка удур шыңгыы тайылбыр, чырыдыышкын ажылын чорудары чугула деп түңнелди “Төөгүнү мегелеп өскертир шенээшкиннерниң болгаш даштыкы идеологтуг доктриналарның салдарының айтырыглары” темага “төгерик столдуң” киржикчилери үндүргеннер.
Ш. МОҢГУШ.
Буян ООРЖАКТЫҢ тырттырган чуруу.
«Шын» №94 2024 чылдың декабрь 7