Төлептиглер аразындан шылгарап үнүп келген

Бөгүн, Культура ажылдакчыларының хүнү, Барыын-Хемчик кожууннуң Саая Хураган-оол аттыг хөгжүм-шии театрының артистеринге ийи дакпыр байырланчыг болган.

Олар март 24-26 хүннеринде Новосибирск хоорайга "Золотая кобра" деп бот-тывынгыр театрлар аразынга болган XXIII дугаар Делегей чергелиг фестиваль-мөөрейге киришкеш, I-ги чергениң лауреады база "За лучший актерский ансамбль" деп хары угда ийи шаңналды чаалап алганнар.

Болган фестивальга 70 ажыг коллектив киришкен. Барыын-Хемчиктиң артистери Олег Богаевтиң "Марьино поле" деп чогаалынга үндезилээн "Сылдыс чүгүрүү" деп шиизин ойнаан. Тургускан режиссеру Тываның алдардыг артизи, В.Көк-оол аттыг Национал театрның режиссеру Орлан Монгуш:

"Шиини ойнап каапкан соонда, жюри кежигүннери бо артистерниң оюнун бедии-биле үнелээн болгаш профессионал деңнели дыка шыырак-тыр деп демдеглеп турду. Өске чылдарда бо-ла фестивальдың Гран-при шаңналын ап турган боорга, бо удаада I-ги чергениң лауреады шаңналды тывысты" - деп, режиссер телефон дамчыштыр чугаалап берген.

Төлептиглер аразындан шылгарап үнүп келген барыын-хемчикчилер өөрүшкү-маңнайлыг Тывазынче аъттаныпкан.

#Шын #Тыва #КультураТувы #Тыватеатр #Барыын_Хемчиктиңтеатры
#ФестивальЗолотаякобра