Тыва биле Россияның культурлуг болгаш социал-экономиктиг хөгжүлдезинге, эрге-ажыының камгалалынга улуг үлүүн кииргеннерге күрүнениң бедик шаңналдарын Тыва Арат Республика ССРЭ-ниң составынга киргениниң 80 чылы-биле холбаштыр тыпсырының ёзулалы октябрь 16-да ТР-ниң Чазааның бажыңынга болуп эрткен. Шаңналдарны Тываның Баштыңы Владислав Ховалыг тывыскан.
Күрүне шаңналдарын тыпсырының мурнуу чарыында Владислав Ховалыг сөс ап, күрүнениң бедик шаңналдарын тыпсырының бөгүнгү ёзулалы Тыва Арат Республика ССРЭ-ниң составынга киргениниң 80 чылының байырлалының уланчызы деп чугаалаан. ТАР-ның ССРЭ-ниң составынга киргени хөй националдыг улуг российжи күрүнениң тургустунуп турганының база бир чадазы-дыр деп демдеглээн.
Тыва Арат Республика ССРЭ-ниң составынга киргениниң 80 чылында бистиң республикага Россияның Президентизи Владимир Путинниң кээп чорааны бо байырлал федералдыг ужур-уткалыг болуушкун дээрзин көргүскенин Владислав Ховалыг онзалап демдеглээн. Президент Тывага кээп чорааш, республикада социал-экономиктиг байдал-биле ханы таныжып, регионга чугула нарын айтырыгларны шалыпкын шиитпирлээр талазы-биле даалгаларны федералдыг органнарга болгаш албан черлеринге бергенин Тываның удуртукчузу дыңнаткан. Ук даалгалар хөй айтырыгларны шиитпирлээринге күштүг деткимче дээрзин ол демдеглээн.
– Күш-ажылчы шылгараңгай чорук, күш-ажылдың кижилеринге хүндүлел бистиң чонувустуң мөзү-шынарының үнелиг чүүлү, ынчангаш республиканың хөгжүлдезинге төлептиг үлүүн киирген кижилерге күрүне шаңналдарын тыпсыры улуг утка-шынарлыг болуушкун – деп, Тываның Баштыңы Владислав Ховалыг чугаалаан.
Бии-Хем кожууннуң культура болгаш туризм эргелелиниң начальниги Федор Анганзоровка Тываның Баштыңының Хүндүлел бижиин тывыскан.
Россияның ОБЯ-ның Тыва Республика талазы-биле эргелелиниң өрт өжүрер албанның ээлчег начальниги, иштики албанның подполковниги Артыш Ховалыгны, Тыва Республиканың перинаталдыг төвүнүң чаа төрүттүнген чаш уруглар салбырының неонатолог эмчизи Светлана Чүлдүмнү «Тыва Арат Республика ССРЭ-ниң составынга киргениниң 80 чылы» юбилейлиг медаль-биле шаңнаан.
Тываның күрүне университединиң студентилер килдизиниң начальниги Чечек Монгушка «Тыва Республиканың алдарлыг ажылдакчызы» атты тывыскан.
Тыва Республиканың чыынды командаларының спортчу белеткел төвүнүң улуг тренери Борис Кульбистеевке «Тыва Республиканың күш-культуразының болгаш спортунуң алдарлыг ажылдакчызы» атты тывыскан.
Кызыл кожууннуң Каа-Хем суурда хууда ажыл-агыйның баштыңы Радомир Иргит «Аът чарыжының алдарлыг мастери» атка төлептиг болган.
Тыва Республиканың бичии уругларның республика эмнелгезиниң тудуу төрүттүнген чаш уруглар салбырының неонатолог эмчизи Татьяна Паркаевага «Тыва Республиканың алдарлыг эмчизи» атты тывыскан.
«Эмчи кижиге дыка үнелиг «Тыва Республиканың алдарлыг эмчизи» атты меңээ тывысканында мени 1980 чылда Тывага эдертип эккелген аныяк эмчи, мээң өөм ээзи, амгы үеде Тываның улустуң эмчизи Николай Паркаевке, 1990 чылдан бээр ажылдап келгеним эмнелгениң коллективинге, кады ажылдап чоруур эш-өөрүмге улуу-биле четтирдим. Меңээ бедик шаңналды тывысканында оларның үлүү база бар» — деп, Татьяна Григорьевна чугаалаан.
«Спорттуң адаптивтиг хевирлеринге спорт школазы» Тыва Республиканың немелде өөредилгениң бюджет албан чериниң тренер башкызы Чечен Доржуевна Саржат-оол «Тыва Республиканың алдарлыг тренери» атты алган.
Кызылда А.Б. Чыргал-оол аттыг уран чүүл колледжизиниң концертмейстери Томас Монгушка «Тыва Республиканың культуразының алдарлыг ажылдакчызы» атты тывыскан.
Культура ажылдакчызынга үнелиг шаңналды тывысканынга өөрүп четтиргенин Томас Конзай-оолович илереткеш, ТАР-ның ССРЭ-ге каттышканының 80 чылының байырлалынга Красноярскының М.Годенко аттыг танцы ансамбли дээш Россияның өске-даа регионнарындан уран чүүл коллективтериниң киришкени республиканың уран чүүл ажылдакчыларынга ажыктыг болганын, ол чогаадыкчы коллективтерниң көргүзүглеринден солун чүүлдерни Тываның уран чүүл ажылдакчылары билип алганын демдеглээн.
Улус өөредилгезинге хөй чылдар дургузунда ак сеткилдиг кызымак ажылы дээш хоочун башкы Дандар-оол Доңгакка «Тыва Республиканың улустуң башкызы» атты тывыскан.
Өвүр кожууннуң өөредилге эргелелиниң начальниги Мариса Начынны «Шылгараңгай күш-ажылы дээш» медаль-биле шаңнаан.
55-ки гвардейжи даг-адыгжы тускай бригаданың медицина ротазының командири, эмчи, улуг лейтенант Ахмед Максидовту, 55-ки гвардейжи даг-адыгжы тускай бригаданың дайынчызы биче сержант Артыш Ондарны «Буян-Бадыргы» орденниң III чергези-биле шаңнаан.
Шаңналдарны тывыскан соонда, Тываның Баштыңы Владислав Ховалыг бедик шаңналдарга төлептиг болганнар-биле чурукка тырттырган.
Ш. МОҢГУШ.
Буян Ооржактың тырттырган чуруктары.
“Шын” №80 2024 чылдың октябрь 19