2017 чылдан эгелеп Тывада өскүс болгаш ада-иезиниң хайгааралы чок арткан уругларны деткээн «Дагдыныкчылар чүгле чанында эвес, а кады!» деп программа ажылдап турар. Дагдыныкчылар ниитилел амыдыралынга уругларны кижизидеринге болгаш чаңчыктырарынга деткимчени көргүзүп турар. Ооң ачызында уруглар боттарының арга-шинээн, бот-медерелин, хууда шынарларын сайзырадыр аргалыг.
Күүсекчи эрге-чагырга органнарының болгаш федералдыг органнарның девискээр эргелелдериниң удуртукчулары болгаш оралакчылары Тываның кадет корпузунуң ийи-үш өөреникчилерин хүлээнип, дагдынып алганнар. Чамдык кадеттер школаны дооскаш, ортумак өөредилге черинде өөренип турза-даа, дагдыныкчылары-биле харылзаазын тутпушаан.
Дыка хөй удуртукчулар Чаа чыл болгаш Рождество байырлалдарында уруглар-биле ужуражып, чигирзиг белектерин чедирип, кышкы дыштанылгазын ажыктыг болгаш солун кылдыр эрттиришкен. Республика Чазааның Даргазының оралакчызы Орлан Сарыглар, Социал фондунуң республикада эргелелиниң, Федералдыг кеземче албанының Тыва талазы-биле эргелелиниң, Өөредилге яамызының, Орук-транспорт яамызының, Чуртталга-коммунал ажыл-агый яамызының, Кадык камгалал яамызының, Культура яамызының, Ветеринария албанының, Күрүнениң чуртталга инспекциязының болгаш тудуг хайгаарал албанының удуртукчулары болгаш оон-даа өскелер бодунуң хүлээнген оолдар, уругларынга четкен.
«Дагдыныкчылар уругларга профугланыышкынныг ужуражылгаларны, ажылдап турар черлеринче экскурсияларны, шиилерже, концерттерже, доштуг чуңгуже үнүүшкүннерни, чогаадыкчы мастер-класстарны, оюннарны, мөөрейлерни организастап, суй белектер болгаш чигирзиг белектерни тывыскан. Уруглар оларның сургакчылаашкыннарын, ажыл-ижин, амыдыралчы арга-дуржулгазының дугайында чугааларны аажок сонуургааннар» — деп, Тываның Өөредилге яамызы демдеглээн.
Республиканың аныяктар херектериниң сайыды — Россияның Маадыры Буян Куулар школа-интернат өөреникчилери-биле ужурашкан, спорт болгаш кадык амыдырал-биле кезээде өңнүктежип чоруурун оолдар, уругларга чагаан.
«Мындыг хемчеглер уругларга чүгле байырлалдың сеткил-хөөнүн оттурар эвес, а уруг бүрүзү кол черде болгаш аас-кежикке төлептиг дээрзин көргүзүп турар. Дагдыныкчыларның кичээнгейи болгаш сагыш човаашкыны уругларга кайгамчык чүүлдерге бүзүрелди болгаш улуг улустуң талазындан деткимче бар деп бүзүрээринге дузалаар» — деп, «Тываның кадет корпузу» республиканың школа-интернадының өг-бүле кижизидилгезинге деткимче төвүнүң удуртукчузу, «Дагдыныкчылар чүгле чанында эвес, а кады!» деп төлевилелдиң куратору Анжела Куулар дыңнаткан.
ТР-ниң Чазааның парлалга албаны.
Чурукту ТР-ниң Чазааның парлалга албанындан алган.
“Шын №2 2025 чылдың январь 22