Төлевилелдерже аныяктарны чалап турар

Тыва Республиканың Аныяктар ажыл-агыйының талазы-биле агентилели Өвүр кожууннуң аныяктарынга өөредиглиг семинарны эрттирген.

Аңаа Тыва Республиканың күш-ажыл сайыды Эдуард Сандан барып четкен. Эң кол спикерлер аныяктар ажыл-агыйының талазы-биле агентилелдиң директорунуң оралакчызы Анай-Хаак Монгуш, килдис даргазы Чейнеш Очур, сайгарлыкчы чорукту деткиир фондунуң төлээзи, эвээш эвес төлевилелдерни боттандыргаш, камгалаан Нэлла Соян олар болганнар.

Ук хемчегге ниитизи-биле кожууннуң 60 хире аныяктары, аныяк малчыннары болгаш Хандагайты ортумак школазының улуг класс өөреникчилери киришкен.

Семинарның киржикчилери дараазында темаларга тодаргай тайылбырлыг лекцияларны чоруткан: “Аныяк сайгарлыкчыларга деткимче хемчеглериниң дугайында”, “Аныяктар политиказының информастыг курлавырларын болгаш оларның эгелекчи саналдарын деткиириниң дугайында”, “Аныяк малчыннарны деткиир төлевилел дугайында”.

Аныяктарны янзы-бүрү төлевилелдерге киржип, оларны боттандырарынче кыйгырган. Айтырыглар тургустунуп келзе, Чонну ажылга хаара тудар, өг-бүлеге болгаш уругларга социал дуза чедирер төптерден, аныяктар болгаш спорт килдизинден, чагырганың төлевилелдер эргелелиниң килдизинден айтырып, арга-сүме ап болур.