Июнь 5-те ТР-ниң Дээди Хуралының тоску сессиязының ээлчеглиг хуралы болуп эрткен. Ниитизи-биле 47 айтырыгны чугаалажып көрген, республиканың хоойлуларынга киирген 14 өскерилгени депутаттар деткээн. “Тыва Республиканың 2023 чылда бюджединиң күүселдезиниң дугайында” хоойлуну хүлээп алган.
Бо хурал ТР-ниң Дээди Хуралының чүгле тоску сессияның эвес, а республиканың парламентизиниң үшкү чыыжының сөөлгү түңнел хуралы. Ооң-биле холбаштыр “Тыва Республиканың Дээди Хуралының (парламентизиниң) дөрткү чыыжының депутаттарының соңгулдаларын эрттирер дугайында” доктаалды хүлээп алган. Ол соңгулдалар 2024 чылдың сентябрь 8-те болуп эртер.
Хуралдың төнчүзүнде ТР-ниң парламентизиниң Даргазы Каң-оол Даваа Дээди Хуралдың үшкү чыыжының ажыл-чорудулгазының түңнелдериниң дугайында илеткээн. Дээди Хуралдың үшкү чыыжының ажылы Россия Федерациязының болгаш Тыва Республиканың күрүне политиказын боттандырарынче, регионнуң социал-экономиктиг болгаш культурлуг хөгжүлдезин хоойлужудулга-биле магадылаарынче угланганын Каң-оол Даваа демдеглээн.
Регионнуң парламентизи-биле чогумчалыг кады ажылдажылгазы дээш Тываның Баштыңы Владислав Ховалыгга, ТР-ниң Чазаанга депутаттарның мурнундан өөрүп четтиргенин Каң-оол Даваа илереткен.
Дээди Хуралдың үшкү чыыжының депутаттарының кылып чоруткан ажылы дээш оларга өөрүп четтиргенин Тываның парламентизиниң Чөвүлелиниң кежигүннериниң мурнундан Каң-оол Даваа илереткен.
Тыва Республиканың Дээди Хуралының (парламентизиниң) дөрткү чыыжының депутаттарының 2024 чылдың сентябрь 8-те болуп эртер соңгулдаларның соонда тус черниң парламентизиниң чаа составы ажылын эгелээр.
Ш. МОҢГУШ белеткээн.
Чуруктарны интернет четкизинден алган.
«Шын» №42 2024 чылдың июнь 8