Кызыл хоорайга «Чаңгыс демниг Россия» партиязының Тывада регионалдыг салбырының 42 дугаар конференциязы болган. Аңаа 2025 чылдың дургузунда кылып чоруткан ажылдың түңнелдерин сайгарып, хыналда комиссиязының отчёдун дыңнап, партияның регионалдыг удуртулга албан черлериниң составын чаарткан. Оон аңгыда Политиктиг чөвүлелге, Президиумга болгаш хыналда комиссиязынга чаа кежигүннер немээриниң дугайында чугаалашкан.
«Чаңгыс демниг Россия» партиязының регионалдыг салбыры эрткен чылдың ажылының түңнелдерин үндүрер болгаш дараазында чылдың стратегтиг угланыышкыннарын тодарадыр кол хемчегни эрттиргени ол.
Тываның Баштыңы, партияның регионалдыг салбырының секретары Владислав Ховалыг конференцияны ажыдып тура, регионнуң хөгжүлдезинге партияның кежигүннериниң ролюн демдеглеп, улуг социал эгелээшкиннерни, ооң иштинде тускай шериг операциязының киржикчилеринге болгаш оларның өг-бүлелеринге деткимчени боттандырарынга үлүг-хуузун киирген идепкейжилерге болгаш эки турачыларга өөрүп четтиргенин илереткен.
"Бо хүнде чугула даалгавыс болза тускай шериг операциязындан чанып келген дайынчыларның адаптациязын эртип, ажыл-агыйга турумчуп алырынга деткимчени көргүзери, оларның өг-бүлелеринге адрестиг дуза чугула дээрзин сагындыраал" – деп, Владислав Ховалыг чугаалаан.
Амгы үеде партияның регионалдыг салбырында 16 муң ажыг кежигүннер, 83 муң ажыг талалакчылар, 19 тус чер болгаш 182 эге салбырлар бар. Тываны өскертиптер улуг программаны, национал төлевилелдерни кады боттандырып, республикага стратегтиг сайзыралдың айтырыгларын шиитпирлеп турарлар.
Тываның чурттакчыларының амыдыралының байдалын экижидеринче угланган национал программаның боттанылгазынче онза кичээнгейни угландырган. Мурнады хөгжүдер угланыышкыннарның аразында өг-бүлениң чаагай чоруун хандырары, оруктуң айыыл чок чоруун бедидери болгаш өзүп орар салгалды кижизидеринге таарымчалыг байдалдарны тургузары кирип турарын ол демдеглээн.
"Келир чылын Күрүне Думазынче депутаттарның соңгулдалары болур. Удавас болур соңгулда кампаниязы дээрге чугула шылгалда-дыр. Соңгукчуларывыска партияның национал төлевилелдериниң, Тываның улусчу программазының, маадырларывыстың дугайында болгаш Президентиниң даалгазы-биле эрткен ийи-үш чылда 10 ажыг амгы үениң школаларын тудуп шыдаанывыс дугайында чугаалаар чүүлдеривис хөй" – деп, Владислав Ховалыг демдеглээн.
Конференцияның эгезинде партияның чаа кежигүннериниң билеттерин тыпсыр байырлыг ёзулалды эрттирген.
"Партияның конференциязы дээрге ооң чедип алган чүүлдерин түңнээр чугула болуушкун-дур. Чедер-четпестерни түңнээш, кайы угланыышкын онза кичээнгей хереглеп турарын тодарадыры-дыр. Янзы-бүрү мөөрейлерниң түңнелдерин үндүрүп, тиилекчилерни илередири-дир. Бо бүгү дээрге партияның шиитпирлеп турар чүүлдери-дир” – деп, Россияның Күрүне Думазының депутады Михаил Кизеев демдеглээн.
Конференцияның байырлыг кезээниң соонда Хыналда комиссиязының отчёдун дыңнааш, партияның регионалдыг удуртулга албан черлериниң составын чаарткан. Оон аңгыда Политиктиг чөвүлелдиң, Президиумнуң, Хыналда комиссиязының кежигүннериниң солчулгазының айтырыгларын сайгарып, оларның санынче чаа кежигүннерни киирген.
Бистиң корр.
Буян ООРЖАКТЫҢ тырттырган чуруу.
“Шын” №47 2025 чылдың декабрь 4