«Кадрлар» национал төлевилелдиң ачызында Тывада ажыл чок хамаатылар болгаш 3 харга чедир уругларын азырап олурар иелер чугула мергежилдерни халас шиңгээдип алыр аргалыг апарган. Чонну ажылче хаара тудар төп ажыл берикчилериниң дилээн ёзугаар чаа курстарны организастап турар.
Бо үеде аңгы-аңгы мергежилдерге өөренир 309 чагыг кирген. Оларның аразында чер ажылы-биле холбаалыг техника башкарыкчылары (бульдозер, экскаватор), электрогаз-дуңзаалакчылары, поварлар, даараныкчылар, трактористер база 4–6-гы разрядтарның таңныылдары херек. Оон аңгыда С биле Д категорияның чолаачыларынга, башня кранының машинизи дээш өске-даа мергежилдерге курстарны сүмелеп турар.
Кызылдың транспорт база тудуг техникумунуң баазазында, ол ышкаш хуу организацияларда болгаш хууда сайгарлыкчыларда өөредилге курстары чоруп турар.
Тускай шериг операциязының киржикчилерин база оларның өг-бүлезиниң кежигүннерин ажылче хаара тудар ажылдар мурнуку черде. 2025 чылдың 7 айының дургузунда 11 ТШО киржикчизин профессионал өөредилгеже чоруткан. Оларның ийизи «автомобильдиг кран машинизи», бир кижи «өртчүлер болгаш эки турачы өртчү дружиналар белеткели» мергежилди, 3 кижи Д категорияның, 5 кижи С категорияның чолаачызында өөренген.
«Тыва Республиканың чурттакчы чонун ажылга хаара тударын деткиири» күрүне программазы-биле республика бюджединден үндүрген акша-хөреңгиге ТШО киржикчилерин өөредип турар.
Бистиң корр.
Чурукту интернеттен хоолгалаан.
“Шын” № 30 2025 чылдың август 7