Тускай шериг операциязынга ээлчеглиг дайынчы хүлээлгезин күүсеткеш, ээп чанып келген хөй-ниитижи дайынчы, “Кара барс” деп шериг албанныгларның хөй-ниити организациязының регионда удуртукчузу Мөңге Тагба-биле Тываның Баштыңы Владислав Ховалыг ужурашкан.
“Сөөлгү катап эрткен чылдың октябрь айда Донецк Улус Республиказының девискээринге ужурашкан турган бис" – деп, Владислав Ховалыг социал четкиде хууда арынынга бижээн. – Бо хүнде гвардейжи апарган мото-адыгжы (даг) бригада Дээди кол командылакчының даалгазы-биле шериг хүлээлгелерин төлептиг күүседип турарын Мөңге чугаалады. Чаа 2024 чылда чуртувустуң Президентизиниң баштай үндүрген айтыышкыннарының бирээзи-биле тывыскан хүндүлүг гвардейжи ат бистиң оолдарывыска бедик ат-алдар болур”.
Тываның Баштыңы Мөңге Тагба-биле шериг оолдарның техниктиг херекселдер-биле чүмнээшкининге хамаарышкан чугааны чоруткан.
“Бис шериг оолдарывысче немелде техниктиг херекселдерни доктаамал дуза кылдыр чорудуп турар бис– деп, Владислав Ховалыг медеглээн. – Кады шериг хүлээлгезин эрттирип турар эш-өөрүнүң өмүнээзинден Мөңге өөрүп четтиргенин илеретти. Ылаңгыя дроннарга удур ажыглаар рюкзактар болгаш бузундулардан камгалаар плащтарны оолдар онза үнелеп хүлээп алган болду”.
Владислав Ховалыг “Кара барстың” удуртукчузундан Тывада чыып эгелээн квадрокоптерлерниң хыналда, шенелдезинге киржирин дилээн. Техниктиг негелделер хүн бүрүде нарыыдап турар болганда, эң-не таарымчалыг шынарлыг херекселдерни чыып, кылыры чугула дээрзин Тываның Баштыңы демдеглээн.
Бистиң корр.
"Шын" №2 2024 чылдың январь 13