Тываның кожууннарын ТШО-га ачы-дуза чедирилгезин чорудары-биле, хуваап каанын сагындыраал. Бо удаада Бай-Тайга биле Мөңгүн-Тайга кожууннардан чыглып келген ачы-дуза чедирилгезин ТШО-же чортурунга белеткей берген.
Март 20-де “Ада-чурт камгалакчылары” Күрүне фондузунуң Тывада салбырындан ол чыглып келген ачы-дуза чүъгүн аъткарган. Улусчу фронтунуң регионалдыг күүсекчи комитединиң удуртукчузу Саима Далчин бо чүъктү “Шупту чүвени Тиилелге дээш!” деп федералдыг төлевилел-биле чорудуп турарын чугаалаан: «Бөгүнден эгелээш, ТШО-да бистиң чаңгыс чер чурттугларывыска ачы-дуза чедирилгезин чорудуп эгелээн. Бай-Тайга, Мөңгүн-Тайга кожууннардан чыглып келген ийи фура – бирээзинче 5 тонна, өскезинче 20 тонна чүъктү чүдүргеш, чорудуп турарывыс бо. Рефрижераторже доңурган эътти, техниктиг херекселдер болгаш өске-даа чүүлдерни чүдүрген. Аңаа немей 3 автомашина база мотоциклди чорудар бис. РЖД таварыштыр автоколонна чорударын планнап турдувус, ынчалза-даа ону чорудар хүн соңгаарлай бээрге, ийи фурган ачы-дуза чедирилгезин аъткарып турарывыс бо” — деп Саима Далчин тайылбырлаан.
“Кожуунувус чону шупту бир демниг бо акцияга киришкениниң түңнелинде, бир тонна эътти база барык 2 тонна ТШО киржикчилеринге чугула херекселдер, идик-хеп аймаа дээш өске-даа чүүлдерни чыгган. Оон аңгыда, үш автомашина болгаш мотоциклди чорудуп турар. Аңаа немей кожуунувус мурнундан бистиң дайынчыларывысче база бир автомашина садып алыры-биле акшаны чыгган бис. Ынчап кээрге, бистиң кожуун мурнундан 4 машинаны фронтуга берген болуп турар. Бо берге үеде демниг чоруу дээш кожууннуң бүгү чонунга четтиргенивисти илередир-дир бис!” — деп, бодунуң ээлчээнде Бай-Тайганың чагырыкчызы Чиңгис Салчак кожуунунуң чурттакчылары ачы-дуза чедирилгезиниң чыылдазынга демниг киришкенин демдеглээн.
ТШО-же ачы-дуза чедирилгезин аъткарар бетинде, ол хөй чүъктү чүдүреринге күш херек. Мындыг таварылгада волонтёрлар дыка улуг дузазын көргүзүп турар. Оларның бирээзи Начын Сырга. Ол ТШО-да байдал дугайында аңаа киржип чораан ачазындан дыңнаан болгаш, эки билир.
– Өске эш-өөрүм-биле кады ачы-дуза чүъгүн чүдүржүрү-биле, чедип келдим. Бо республиканың эриг баарлыг чонундан чыглып келген ачы-дуза чедирилгези дайынчыларга кайы хире херегин эки билир мен. Чүге дээрге ачам аңаа киржип чораан – деп, ол чугаалаан.
ТР-ниң Көдээ ажыл-агый яамызының килдис эргелекчизи Чодураа Иргиттиң дыңнатканы-биле алырга, кожууннардан 1 тонна 750 кил аът, сарлык, инек, хой эъдин чыып белеткээн. Доңурган эътти барган черинге үлээринге эптиг кылдыр хаптарда белеткээн. Ол ышкаш эъттиң чамдыызын тырткаш, доңургулаан.
Бистиң корр.
Буян ООРЖАКТЫҢ тырттырган чуруктары.
«Шын» №22 2024 чылдың март 23