Таңдының орук патруль албанының ажылдакчылары «УАЗ – 315121» маркалыг автомашинаны хынаар дээш доктаадыптарга, чолаачызы Эрзин кожууннуң 24 харлыг хамаатызы болган. Машинаның салонунуң иштин хынаан түңнелинде, «Тигр» деп боо болгаш сыын эъди тывылган.
Сайгаржып кээрге, чолаачы-биле кады чораан 46 харлыг хамаатының боозу болган. Боонуң ээзи-даа болза, сыын аңнаар чөпшээрел бижиин көргүспээн.
Ук хоойлу хажыдыышкыны дээш, 2 чылга чедир хосталгазын казып шииттирип болур. Хавырган сыын эъдин Эрзин кожууннуң мал эмнелгезинче чорудупкан. А боону ИХЯ-ның эксперт эрттирер төвүнче чоруткан.
ИХЯ-ның парлалга албанының медээлеринден А.ОНДАР белеткээн.
Чурукту интернет четкизинден алган.
"Шын" №65, 2023 чылдың сентябрь 2