Чоокта чаа Таңды кожууннуң Межегей ортумак школазының күш-ажыл башкызы Валерий Бакайның ажылдап олурар кабинединге сонуургап чеде бердим. Межегей школазының өөреникчилериниң ажыглалында бүдүн мастерская бар болду. Мастерскаязын чараштыр кылып алган. Ында өөреникчилерниң ыяштан болгаш өске-даа материалдардан кылган ажылдарын делгеп салган. Оолдар биле уругларга кичээлдээринге ийи аңгы кабинетти таарыштыр кылган. Мастерскаяның кирер эжиин чараштыр каастап кылып алганындан башкының чазаныр шынары оон көстүп турар.
Валерий Доңгакович Межегей ортумак школазының дээди чаданың күш-ажыл (технология) башкызы, төрээн чери дээш туруштуг, соруктуг, салым-чаяанныг, дагдыныкчы башкы. Ниити ажыл стажы 40 чыл, ооң иштинде 22 чыл иштинде башкылап чоруур.
Ооң ажылгыр-кежээ, биче сеткилдиг, буянныг аажы-чаңы чүгле өөреникчилерин эвес, а ону таныыр кижи бүрүзүн сорук киирип чоруур. Межегей ортумак школазының доозукчузу, бүгү назынын төрээн школазынга бараалгадып, хөй салгалдарның өөреникчилеринге ёзулуг үлегер-чижээн көргүзүп чоруур. Валерий Донгакович өөреникчилеринге чүгле эртем-билигни дамчыдар эвес, а салым-чаяанын ажыдарынга база дузалаар.
Эге школа назылыг уруглар-биле кижизидилге ажылының бир хевири кылдыр «Бодуң кыл» деп бөлгүмнү эрттирип турар. Ооң удуртулгазы-биле бөлүктүң өөреникчилери республика чергелиг даштан, ыяштан чонуп кылган дүрзүлер делгелгелериниң болгаш мөөрейлериниң тиилекчилери болуп турары дээрге башкының кызымаккай ажылын бадыткап турар.
В.Д. Бакайның күжениишкиннериниң болгаш өөреникчилериниң ажыл-чорудулгазының ачызында Межегей школазын өскертип каан: стенд болгаш фасад чаарттынган, беседка биле доозукчулар аллеязы туттунган.
Чедиишкиннери дээш Валерий Донгакович хөй санныг шаңналдар-биле, ооң иштинде Тыва Республиканың Өөредилге болгаш эртем яамызының хүндүлел бижиктери, РФ-тиң Өөредилге яамызының өөрүп четтириишкин бижии болгаш албан черлериниң хүндүлел бижиктери-биле шаңнаткан.
Ооң аныяк салгалды кижизидеринге, белеткээринге киирген үлүг-хуузун үнелээри берге. Валерий Донгакович «Чүрээмни уругларга берип тур мен» деп “Таңды–2025” профессионал мөөрейниң муниципалдыг чадазынга тиилээш, бодунуң бедик деңнелдиг мергежилин болгаш ажылынга бердингенин база катап бадыткаан.
В.Д. Бакай кады ажылдап турар башкыларының, өөреникчилериниң, ада-иелериниң база доозукчуларының хүндүткелин чаалап алган. Ооң биче сеткилдиг болгаш буянныг чоруу ону чүгле кайгамчык башкы эвес, арга-сүме, деткимче дилеп болур кижи кылдыр бадыткаан.
/ Сергей ТЫРТЫК.
Авторнуң тырттырган чуруктары.
“Шын” №46 2025 чылдың ноябрь 27