Ыраккы кожууннарның чаагайжыдылгазы
Бо хүннерде республиканың хоорай, суурларында «Таарымчалыг хоорай хүрээлеңин хевирлээри» деп федералдыг төлевилелдиң онлайн-бадылаашкыны кидин түлүк чоруп турар. Солуннуң мурнунда үндүрүлгелеринде идепкейлиг киржип турар кожууннарны чырыткан бис. Бо удаада ыраккы кожууннарның чурттакчы чону бадылаашкынга кайы хире киржип турарын za.gorodsreda.ru айтыгже киргеш, сонуургап көрээлиңер.
Мөңгүн-Тайга кожуундан 3 төлевилел киржип турар. Үжелдирзи кожуун төвү Мугур-Аксы суурну чаагайжыдарынче көрдүнген. Кожууннуң бичии сумуларында чаартыптар, чаагайжыдыптар черлер чок болган хире. Мугур-Аксы суурда Саны-Шири кудумчузунда, кожуун чагыргазындан ырак эвес девискээрге массалыг хемчеглер эрттирер, брусчатка-биле шыпкан шөл турзун дээш бо хүнде 93 кижи бадылаан.
Дараазында күш-культура болгаш спортка хандыкшылдыг аныяктарга Аэропортная кудумчузунда спортчу шөлдү кылыры көрдүнген. Аңаа элээдилерге биче футбол, хол бөмбүү, баскетбол ойнаар шөлдер, бичии чаштарга чайганыыштар, ойнаар шөлчүгештер турар. Ол дээш 39 кижи үнүн берген. Массалыг хемчеглер эрттирер шөл орнунга, аныяктар болгаш элээдилерни спортка хандыкшыдар спорт шөлү херек-даа ышкаш.
А эң-не хөй сан Кошкар-оол кудумчузунда стадионнуң чаагайжыдылгазы дээш — 164 үн. Улуг маргылдаалар, хүрештер эрттиреринге хөй чон чыглыр стадион черле херек, ажыктыг.
Дараазында Тере-Хөл кожуун. База-ла кожуун төвүнге хамааржыр ийи төлевилел бар, бирээзи – Кунгуртуг суурга хүрээ, ийи дугаары эрик кыдыын чаагайжыдары.
Ыдыктыг хүрээниң девискээринче кирерде, П хевирлиг «Тории» хаалганы тургузар, долгандыр бедик демир херимнер, узун сандайлар тургускаш, ол черни ногаанчыткаш, чырыдар. Кирер оруун дургаар плиткалааш, чечектерлиг чалдар, чайгы беседка база долгандыр кажаалаан бок хааржактарын тургузар. Бо хүнде мөңгүн-тайгажылардан 18 кижи ыдыктыг хүрээ тудуу дээш бадылаан.
Ийи дугаар төлевилелде эрик кыдыын херимнээш, камгалал чаактар кылгаш, черин плиткалааш, дургаар чырыдып каар. Ол ышкаш чурттакчы чонга суг кыдыынга агаарлап дыштанырынга таарымчалыг узун сандайлар база турар. Эрик кыдыының чаагайжыдылгазы дээш 19-ла кижи үнүн берген.
Чедери берге ырак кожууннарывыс база чаарттынзын, хөгжүзүн дээр болзувусса, тус черниң чурттакчылары ам-даа идепкейин көргүзер болза эки-дир. Ынчангаш интернет четкизин таварыштыр онлайн-бадылаашкынга албан киржиңер.
Канчаар бадылаарыл? za.gorodsreda.ru айтыгже киргеш, чурттап турар регионун (Тыва Республика) шилиир. Дараазында «Принять участие» азы «голосование» деп бижикти базыптарга, «Требуется вход» деп бижик үнүп келир. «Госуслугиже» киргеш, «Проголосовать» деп бижикти тыпкаш, базар. Бодунуң кожуунун даңзыдан тып, шилип алыр. Ооң соонда соңгуур дээни төлевилелдиң дужунга «Деткип тур мен» деп демдекти базып, үнүн кадар. Хамааты туружуңар көргүзүп, идепкейиңер көргүзүңер.
/ Алдынай АРАКЧАА.
Чуруктарда: Кунгуртуг суурда бадылаашкынче кирип турар девискээр болгаш Мөңгүн-Тайга кожуунда чаагайжыдар девискээрлернин макеттери