Таарымчалыг өртекке аъш-чем аймаа.

Бии-Хем кожууннуң тус черниң бүдүрүкчүлериниң ярмарказынга чон хөйү-биле келген. Аъш-чем дээжилерин дистиништир салган баартактарда делгеп салган.

«Аржаан» көдээ ажыл-агый хереглел кооперативиниң удуртукчузу Нэлли Чамзы, социал керээге үндезилээн күрүнениң деткимчезин алган, кондитер кылыглар цегиниң ээзи Чечена Маады, хууда малын тудуп турар Аржаан школазының төлээзи, сумунун тергиин ногаа ажаакчызы Чойганмаа Кызыл-оол, тыва херээжен чоннун каасталгазын кылып турар ус-шевер Роберт Монгуш, Аржаан сумузунуң чагырга чериниң база культура ажылдакчылары, "Энелер" хоочуннар чөвүлелиниң тергиини Вера Кужугет олар ярмаркага идепкейлиг киржип, боттарының продукциязын чонга бараалгатканнар.

"Алдын күс - 2022" ярмаркага кожууннуң көдээ ажыл-агыйның тергииннеринге шаңнал-макталдарны тывыскан. Бии-хемчилер дузаан ногаа аймаан, вареньелерин, оран-таңдызының кежиин, ак чем дээжизин, кондитер кылыгларын, торттарны, аргаан, даараан хепти, тыва каасталгаларны таарымчалыг өртекке садып-сайгарган.

Тус черниң бараан бүдүрүкчүлери-даа, садып алыкчылар-даа кожууннуң чагырга чери дүжүт байырлалын бедик деңнелге эрттиргенин онзалап демдеглеп турган.