«Евраазия – арга-хоргалыг дип» деп мөөрей совет үеде эп-найыралдыг чурттап чораан акы-дуӊмалышкы чоннарныӊ аразынга амгы үеде найыралды быжыглаар, улаштыр сайзырадыр сорулгалыг.
Бо чылын делегей чергелиг мөөрейге Ариана Хомушкунуӊ «Тыва улустуӊ чаш каасталгазыныӊ студиязы» деп төлевилели тиилээн.
Хамаарышпас күрүнелерниӊ демниг каттыжылгазыныӊ (СНГ) чурттарынга тыва улустуӊ чаш каасталгаларыныӊ делгелгезин эрттирери-биле, бир дугаарында, Таждикистанга барып четкен.
Россотрудничествонуӊ Таджик Республикада төлээ черинде культура ажыл-херээниӊ башкарыкчызы Зафар Абдуалимов аалчыларны хүндүткелдиг уткуп хүлээп алган.
Таждикистанныӊ Шахринав районунда «Нур» деп лицейге делгелге организастаан.
«Тыва улустуӊ чаш каасталгазыныӊ студиязы» деп төлевилелдиӊ удуртукчузу Ольга Кендиван – Тываныӊ күрүне университединиӊ химия кафедразыныӊ доцентизи ук ажылды таныштырып чугаалаан. Аныяк-чалыы өөреникчилерге чаш каасталгаларыныӊ янзы-бүрү хевирлериниӊ дугайында ТывКУ-нуӊ биология, экология кафедразыныӊ доцентизи Чечекмаа Назын тайылбырлаан.
«Боошкун» биле «Чавага» деп каасталгаларны кылырыныӊ талазы-биле мастер-класстарны Бай-Тайганыӊ Шуй ортумак школазыныӊ башкызы Маргарита Чыргал, Эрзинниӊ Бай-Даг ортумак школазыныӊ башкызы Айлаңмаа Хертек эрттирген.
Солун хемчегге «Нур» лицейниӊ башкылар коллективи база киржип турган.
– Тываныӊ делегациязыныӊ аалдап келгени дээрге чоннар аразында эп-найыралдыг, ук-төөгүден бээр чаӊгыс аай культуралыг болуп чорааныныӊ көскү бадыткалы-дыр. Культура дээрге чоннарныӊ чоок болгаш быжыг демниг болурунуӊ чугула барымдааларыныӊ бирээзи-дир – деп, лицейниӊ директору Галина Зиедулоева демдеглээн.
Делгелгени көрүп чедип келген улус Төп Азияныӊ: Туркменистан, Казахстан, Узбекистан, Таджикистан, Тыва, Даг-Алтай чоннарыныӊ чаш каасталгазыныӊ дугайында чаа болгаш солун чүүлдерни билип алган.
Чаш каасталгазы – чараштаныр эдилел болурундан аӊгыда, кижиниӊ социал байдалын, назы-харын, эр-кыс хиндиин көргүзер демдээ. Каасталга бүрүзүн тус-тузунда көргүспүшаан, утказын тайылбырлап берген.
Россотрудничествонуӊ Чаа чылда ачы-буянныг акциязынга ажыглаар кылдыр делгелгениӊ 20 экспонадын Таджик Республикада төлээ черинге дамчыдып берген.
Тывадан барган аалчылар Таждикистанныӊ найысылалы Душанбе хоорайныӊ онза чараш черлеринге, бурунгу төөгүнүӊ национал музейинге, Таджик күрүнениӊ Садриддин Айни аттыг опера болгаш балеттиӊ академиктиг театрынга барып чораан.
Акы-дуӊма таджик чон-биле быжыг харылзааныӊ амгы үеде уламчылап турарыныӊ база бир үлегери ол.
ТывКУ-нуӊ медээлеринден Р. ДЕМЧИК очулдурган.
“Шын” №99 2024 чылдың декабрь 25