Оруктарның дошталы бээри кижилерге орук шимчээшкининиң үезинде айыыл тургузуп болур чылдагааннарның бирээзи болур. Ол чүгле чадаг кижилерге эвес, а машина-техникага база айыылды тургузуп турар.
Кышкы үеде оруктар дошталы бээрге, кудумчуга тайгаш, кадырлыр, булчуур, сынар дээн ышкаш кемдээшкин алган таварылгалар 2 катап көвүдей бээрин эмнелге ажылдакчылары демдеглеп турар.
Кемдээн улус санын көвүдетпейн, бодуңарга-даа хилинчек тургуспазы-биле, эмчилерниң-даа ажылын чиигедири-биле дараазында дүрүмнерни сагыыры чугула.
Кудумчуга кедер идииңер тайгыр болбас ужурлуг. Бедик ээжектиг идик кеткен ажыы чок. Тайып болур айыылдыг черлерни оваарымчалыг көрүп кылаштаарын билир бис. Доштуг черни оюп эртери болдунмас болза, хаак кеткен кижи ышкаш аяар эртер. Орук кежерде, кончуг кичээнгейлиг, далаш чокка, маңнавайн эртсе чогуур.
Кышкы орукка тайбас деп бодаар болза, холдар хостуг болуру күзенчиг. Ындыг-даа болза аар сумкалар туткаш, кылаштаар ужурга таваржыр бис. Кажан сумкалар тудуп алгаш кылаштап чорааш, тая берген болза, ында буступ үрели бээр чүүлдер дээш сагыш човаваңар. Кол-ла чүве кижиниң кадыы болур. Тая бергеш, олура дүжерге, улуг кемдээшкин албас, аңдарлырга, чымчак болгаш чүгээр болур. Кемдээшкин бар-чогун көрүп, кыдыында кижилерден дузадан дилезе чогуур.
Эң-не айыылдыг таварылга кажан ооргазы, арны-биле дүжерге, баштың мээзи кемдеп болур. Кемдээшкин алган соонда, эмчиге барып көргүстүрүп алыры чугула.
Айыыл чок чоруктуң бөдүүн дүрүмнерин сагып, боттарывыска, чоок кижилеривиске камныг, хумагалыг болуру бистиң холувуста.
Чыжыргана СААЯ.
Чурукту интернет четкизинден хоолгалаан.
“Шын” №44 2025 чылдың ноябрь 13