Аныяктар шуулганы
Бөгүн, ноябрь 28-те, Кызылдың Аныяктар өргээзинге «Тайбың болгаш эп-сеткил» деп аттыг аныяктар шуулганы болуп эрткен. Ук хемчегни Тыва Республиканың Националдар херектериниң талазы-биле агентилели организастап эрттирген. Аңаа республиканың ортумак өөредилге черлериниң сургуулдары болгаш школаларның өөреникчилери 250 хире кижи киришкен.
Тыва Республиканың националдар херектериниң талазы-биле агентилелдиң директору Светлана Ощепкова шуулганны ажыдып тура, өжээннешкек хөделиишкиннер, экстремисчи база радикалдыг шажынчы шимчээшкиннер профилактиказынга тураскааткан шуулган дээрзин чугаалаан.
«Сөөлгү үеде социал четкилерде ажы-төлдү айыылдыг чүүлдерже кыйгырып турар хөй-ле бузурукчулар тыптып келген. Ол чүгле Тывада эвес, бүгү Россияда берге айтырыг-дыр. Бистиң сорулгавыс — бо уруглар таварыштыр хөй-ниитиге ооң кол утказын чедирери: Россия Федерациязының чаңгыс демин үрээринче угланган кыйгырыгларны дыңнап база күүсеткен ажыы чок» — деп, Светлана Ощепкова дыңнаткан.
Шуулганга тема аайы-биле шөлчүгештерни организастаан, ооң иштинде Луганск Улус Республика-биле телекөвүрүг база кирип турар. Ооң-биле чергелештир Россияның чоннарының ассамблеязының регионалдыг салбырының таныштырылгазы, ол ышкаш дискуссиялар, мастер-класстар болгаш культурлуг хемчеглер база болган.
Кызылдың транспорт техникумунуң сургуулу Алексей Ставров шуулганга бодунуң үежилеринге сагындырыгны кылган: «Бодал чок чүүл кылбазыңарны күзээр-дир мен, экстремисчи бөлүктер-биле харылзаа тутпаңар!»
Хемчегге шажын-чүдүлге баштыңнары база киришкен. Кензур-лама Байыр-оол Шыырап аңаа сөс алган: «Бистиң хөй национал чоннуг чуртка шажын-чүдүлгези хамаанчокка кижилер бот-боттарын хүндүлежири чугула. Кол чүүл — бис шупту кижилер бис деп билири. Аныяк салгалдарга боттарының чүдүлгезин, культуразын, ёзу-чаңчылдарын база төрээн дылын хүндүлеп чоруурун күзээр-дир мен. Бот-боттарын билчип база өгбелериниң дугайында сактып, оларның төөгүзүн болгаш үнелиг чүүлдерин билип чорууру чугула».
Туранның епискову Ермоген бодунуң талазындан база немей чугаалаан: «Чүгле өөренип база билиг чедип алырындан аңгыда, долгандыр чүү болуп турарын сайгарып билири чугула. Ынчан чүгле аныяктар шиитпирлиг болгаш оларның мээ-медерелинге салдар чедирер база бистиң чуртувусту сандарадыр дээн күткүкчүлерниң семээшкиннеринге удур туржуп шыдаптар. Маңаа аныяк кижи бүрүзүнүң харыысалгазы эң-не кол — ооң иштики күжениишкини, сайзыралче чүткүлү база долгандыр делегейже көрүжү.
Шуулганны РФ-тиң Президентизиниң 701 дугаар Чарлыы-биле тургускан «Россияның чоннарының ассамблеязы» хөй-ниити күрүне организациязының деткимчези-биле эрттирген. Ук организацияның кол сорулгалары — күрүнениң национал политиказын экижидери, бүгү-российжи хамааты үзелдерин база националдар аразының эп-сеткилин быжыглаары.
Бистиң корр.
Буян ООРЖАКТЫҢ тырттырган чуруктары.