Найысылалдың чурттакчылары болгаш аалчыларының чылдары-биле агаарлап, дыштаныр сураглыг черлериниң бирээзи – «Тайга» станциязы.
Ынаар кыш-чай чокка муң-муң кижилер бүдүн өг-бүлелери-биле барып, күс боорга, каттап, мөөгүлеп, кыш боорга, чуңгулап, хаактап, маңган ак харга ойнаар спорттуң хевирлеринге бодун тураскаадып, сеткилинден дыштанып турар. Ылаңгыя Чаа чылдың болгаш Шагааның дыштаныр хүннеринде аңаа кижи бажы кизирт болур. Машина-балгат тургузар хостуг черлер безин тывылбайн баары чажыт эвес. Соокка доңа бергеш, чынныптар, изиг шай ижиптер улуг делгем оран-сава чогундан колдуунда-ла кижилер боттары изиг суксуннарын, хүнезиннерин белеткеп алгаш барып турар. Ында-мында эът шиштээн, газплиталарда манчы хайындырып, паштанган улус-ла хөй.
Чурттакчы чонга эптиг байдалды тургузары-биле Тываның Чазааның Даргазы Владислав Ховалыг хамаарылгалыг яамы, ведомстволар болгаш Кызыл хоорай чагыргазы-биле хуралдааш, «Тайга» станциязын улам хөгжүдүп сайзырадыр комплекстиг төлевилелди ажылдап кылырын дааскан. Кол-ла сорулга – дыштаныкчыларга эптиг байдалдарны тургузары. Ынчангаш амдан эгелеп удур чаап турар хөртүк харны үргүлчү аштап, машиналар тургузар черлерни калбартып, хууда сайгарлыкчылар-биле кады ажылдажылганы экижидер деп дугурушкан. Чоорту «Тайга» станциязы амгы үениң негелделеринге дүгжүр дериг-херекселдер, оран-сава-биле чүмнеттинген улуг дыштанылга-кадыкшылга девискээри апаар.
«Баштайгы базымнар кылдынган. Республиканың болгаш найысылалдың эптиг-демниг кады ажылдажылгазының ачызында чоннуң ынак дыштаныр черин оон-даа аянныг, эптиг, чараш болгаш барыксанчыг кылдыр кылыптарывыска бүзүрээр мен» — деп, Чазак Даргазы Владислав Ховалыг демдеглээн.
Н. ДУН-КУУЛАР.
ТМГ-ниң болгаш интернет четкизинден алган чурук.
“Шын” №1 2026 чылдың январь 15