Бир-ле катап олут орбас, чыдын чытпас экер-эрес ядыы эр кадагааты өске чуртка чоруп чорааш, ол черниң улузу тараа тарып чип, кайгамчык тодуг-догаа чурттап турарын магадап көрген. Амданныг, хоолулуг ол чемни садып алыр дээрге, бодунуң чурт девискээринден чаңгыс борбак үрезин-даа үндүрүп болбас, кадыг-дошкун хоойлулуг чер болган. Эр-даа чүү боор, үжээшкин-чиндиишкинден үнер чаңгыс арга бодап ап-тыр. Ол чиңге-тарааның каш үрезинин дыргактарының аразынга тырып алгаш, оран-чуртунга ээп чанып келген иргин.
Оол тараазын чазын тарып кааш, күзүн ажаарга, кыштап чииринге четчип, үрезининге безин артып каап турган-дыр. Оон бээр-ле Тыва чуртунга чиңге-тарааны тарып эгелээн болгаш улус-чон тодуг-догаа чурттап, улам бай шыдалдыг апарган дижип чугаалажыр.
Чап ЧҮЛДҮМ.
“Шын” №86 2024 чылдың ноябрь 9