Тарас Делег: "Ыдыктыг хүлээлгевис-тир".

Тускай даалга күүседир кезектиң хоочуннарының хөй-ниити организациязының Тывада регионалдыг салбырының даргазының хүлээлгезин күүседип турар Тарас Делег бо хүннерде чуртта чарлаттынган долу эвес мобилизацияга хамаарыштыр бодалы-биле үлешкен:

“Долу эвес мобилизация чарлаттынмаанда-ла бистиң хөй-ниити организациявыстың хоочуннарының чартыы тускай шериг операциязынче киржип чорупкан, ында ада-чурт камгалаар хүлээлгезин күүседип турар. Оларның аразында 2 - 3 удаа чоруп турар оолдар безин бар. Мобилизацияны чарлаптарга, база бистиң хоочуннарывыс мөөңнээшкин аайы-биле кыйгыртып эгелээннер. Чүге дизе бистиң организациявыста Чечен Республикага, Сирияга тускай шериг операцияларынга киржип турган, дайынчы арга-дуржулгалыг хоочуннар кирип турар болгай. Амгы үеде шериг албанын эрттирип турар оолдарны санаваска безин 190 ажыг кижи бар бис. Бистиң, эр кижилерниң, чуртту камгалаары - ыдыктыг хүлээлгевис ышкажыл. Шериг албанын эртип тургаш, берген даңгыраавыста безин бижип каан болгай. “Чер-чуртка айыыл халдап келзе, херек болза, амы-тынывыс-даа бээринден чалданмас бис” деп даңгыраглаан болганывыста, ону боттандырар апаар бис. Тываның Баштыңының саналы-биле мобилизацияже чоруп турар оолдарывыстың өг-бүлелеринге аъш-чем болгаш одаар от-көзү дээн ышкаш чугула айтырыгларга ачы-дуза көргүстүнүп эгелээнин долузу-биле деткиир-дир мен. Кижи бүрүзүнүң бажың-балгадында эр кижиниң кылыр ажылдары-ла хөй болгай - хөмүр, ыяш белеткээр, ажы-төлүн аъш-чем-биле хандырар дээш... Төрээн чуртун камгалап чоруп турар оолдар бо талазы-биле өг-бүлелери дээш сагыш човавазын дээш дыка шын ажылды чорудуп турар-дыр”.

К.Монгуш