Россияның кожа регионнарының аразынга электри энергиязын дамчыдарының өртектериниң тарифтерин кады өйлээрин элээн каш чылдар дургузунда чорудуп келген. Чижээлээрге, Краснодарск край биле Адыгея Республика, Алтай Республика биле Алтай край, Калмыкия Республика биле Ростов облазы, Курган облазы биле Тюмень облазы.
Ындыг арганы Тыва болгаш ооң чоогунда регионнар аразынга ажыглаар сорулга-биле кожазында регионнарның тариф политиказын республиканың Чазаа сайгарып көөрге, аңаа эң таарымчалыг регион Иркутск облазы болган. Бо регион биле Тываның аразынга электри энергиязын дамчыдарының өртектериниң тарифтерин кады өйлээриниң айтырыгларын Иркутск областың удуртулгазы-биле бистиң республиканың Чазаа дугуржуп чугаалажып, федералдыг эрге-чагырганың мурнунга база ону тургузуп турган.
Электри энергиязын дамчыдарының тарифтерин Тыва Республика биле Иркутск облазы кады өйлээриниң дугайында шиитпирни Россия Федерациязының Чазаа хүлээп алган дугайында Тываның Баштыңы Владислав Ховалыг массалыг информация чепсектери дамчыштыр чарлап дыңнадып, РФ-тиң Чазааның Даргазы Михаил Мишустинге, Иркутск областың губернатору Игорь Кобзевке өөрүп четтиргенин илереткен.
— Электри энергиязын дамчыдарының өртектериниң таривин Иркутск область-биле кады өйлээри бистиң республикада юридиктиг эрге-байдалдыгларга электри энергиязының өртээн 2024 чылдың июль 1-ден 14 хуу хире чиигедир арганы бээр – деп, Владислав Ховалыг бодунуң блогунга бижээн.
— Республикада чурттакчылыг черлер тарамык, оларның аразы ырак болгаш, электри четкилериниң шугуму дыка узун. Бо чылдагаан-биле электри шугумнарының байдалын хынаарынга, септеп-селииринге, чаартырынга, оларны дамчыштыр электри энергиязын дамчыдарынга чарыгдалдар хөй, ынчангаш тарифтер база улуг. Электри энергиязын дамчыдарынга тарифтерни Тыва биле Иркутск область кады өйлээр арга тыптып келгени республикада биче-даа, улуг-даа бүдүрүлгелер электри энергиязының өртээн эвээшти төлээр арганы тургузар, оларның сайзыралынга эки салдарлыг боор – деп, Тываның одаар чүүл болгаш энергетика сайыды Эдуард Куулар чугаалаан.
— Баш бурунгаар санаашкыннар-биле алырга, ийи кожа регионнарның тарифтери чаңгыс аайлажы бээрге, Тывага электри энергиязының өртээ улуг хемчээлдиг өспезинге эки салдарлыг болур – деп, республиканың Тарифтер албанының удуртукчузу Елена Бочарова тайылбырлаан.
Ш. ЛОПСАН белеткээн.
Чурукту интернет четкизинден алган.
“Шын” №32 2024 чылдың апрель 27