Эпидемиологтуг сезоннуң эгезинден тура саргыга ызырткан таварылгалар 11 административтиг девискээрге демдеглеттинген. Найысылал Кызылга 224, Кызыл кожуунга 88, Таңдыга 83, Бии-Хем болгаш өске-даа черлерге 50 таварылга илереттинген.
Эрткен неделяда саргыга ызырткан 34 кижи республиканың эмнелгелеринге келген. Ооң мурнундагызынга бодаарга, 27,7 хуу эвээжээн.
Саргы энцефалидинге удур тарылганы чылдың кайы-даа үезинде салдырып болур. Ынчалза-даа эң-не эптиг үези – күзүн болгаш кыжын. Бичии уругларны, малчыннарны, орук ажылдакчыларын болгаш ажык дээр адаанда үр үе дургузунда ажылдап чоруур кижилерниң тарылгазын бюджет акша-хөреңгизи-биле саткан вакциналар-биле эмнелгелерде чорудуп турар. Бо чылын Кадык камгалал яамызы 30 260 туң вакцинаны саткаш, эмнелгелерге хувааган. Саргы ызырыпкан соонда 3 хонук дургузунда дүргени-биле салыр 150 иммуноглобулинни республика бюджединден саткан.
Саргы энцефалидинге удур 4239 улуг кижини болгаш 9021 бичии уругну тараан. План ёзугаар 3038 улуг кижини болгаш 8993 бичии уругну тарыыр ужурлуг турган. Ол ышкаш план ёзугаар 11975 бичии уругну катап тарааны, 12849 уругга тарылганы кылгаш, планны ажыр күүсеткен.
Тарылганы 2 катап салыр, аразы 1-ден 7 ай чедир. Бир чыл эрткенде катап тарыдар, дараазында 3 чылда 1 катап тарыыр.
Ажык дээр адаанче үнерде, саргыдан камгаланып, шын кеттинип алыры чугула. Чырык өңнүг узун чеңниг муңгаш хеп, башка бөрт азы аржыыл кедер, чүвүрнүң хончузун ук азы сапог иштинче суп алыр. Саргының хөй чыглыр чери сиген кырынга олурбазын сүмелеп турар.
Ол ышкаш саргы коргудар, хораннаар чаштырар херекселдерни ажыглаар. Акарицидтиг мазьтарны кешке чаап болбазын сагындырып турар.
Кадык камгалал яамызының медээлеринден Чыжыргана СААЯ белеткээн.