Күш-ажылчы чедиишкиннери, ат-сураа Тывада алгыг тараажы Михаил Санниковтуң Таңдыда Дүрген хем унунда тараа шөлдеринде чаашкынналдырып суггарар “WodaR» марканың машиназын Новосибирск хоорайда “Техпромторг” компанияның специалистери тургузуп каан. Ол машинаны Кыдатта бүдүрүп үндүрүп турар.
Бо компанияның төлээзи Андрей Ширяевтиң “Шынның” корреспондентизинге дыңнатканы-биле алырга, чаашкынналдырып суггарар кыдат машинага суг сордурар күчүлүг насосту Ставрополь хоорайда “Гидроресурс” бүдүрүлге тургускан. Чаашкынналдырып суггарар машинаның терге бүрүзүн тускай электрилиг шимчедикчи чуукталдырып чоруур. Машинаның долганып суггарар шөлүнүң радиузу 3 908 метр азы бир долгангаш, 47 га шөлдү суггарып кааптар – аңаа 6 киловатт электроэнергияны чарыгдаар. Ол машинаны бир шөлден өске шөлче көжүрүп болур, а шөл бүрүзү суг мөөңнеп аксыр улуг кудуктуг болур ужурлуг – оон сугну машина шөлче чаашкынналдыр чажар. Бо кыдат машина ийленчек черлерде шөлдерни-даа суггарып шыдаар күчүлүг.
Кыдат машинаның ажылын “ырактан” телефон азы компьютер дамчыштыр башкарып, ооң ажылын хайгаарап, чаашкыннал- дырып суггарарын өйлеп болур.
Дүрген хем унунда суггарылга системазында суг мөөңнеп аксыр улуг кудуктарны белеткеп доозуптарга, чаашкынналдырып суггарар кыдат машинаның ажылын эдиктирер болгаш ажыглалга киирер ажылды Новосибирск хоорайда “Техпромторг” компанияның специалистери чорудар.
Чаашкынналдырып суггарар “Фрегат” дээн ышкаш суггарылга машиналарын Тываның шөлдеринге, чижээлээрге, Кызылдың аэропорт артында шөлге совет үеде ажыглалга киирген. Ынчалза-даа электри энергиязын ол машиналар хөйнү чарыгдаар, ынчангаш оларны ажыглаары карылгалыг деп чугааны чамдык специалистер болгаш экономистер үндүрүп турганнар. “Техпромторг” компанияның специалистериниң дыңнатканы-биле алырга, чаашкынналдырып суггарар кыдат машиналарны ажыглаары – орулгалыг.
Ш. МОҢГУШ.
Чурукту интернеттен хоолгалаан.
“Шын” №27 2025 чылдың июль 17