Понедельникте Чазакка республиканың лицейлер, школаларын тергиин эки дооскан медалистер, чаңгыс аай күрүне шылгалдаларын 100 баллга дужааган болгаш бүгү Россияның школачылар аразынга эртемнер аайы-биле федералдыг олимпиадалар тиилекчилери-биле ужуражылганы эрттирген. Чазак Даргазының оралакчызы Алексей Сазан-оол Тываның Баштыңының өмүнээзинден доозукчуларга байырын чедирип, чурттуң дээди өөредилге черлеринче кирип ап, доозуп келгеш, республиканың хөгжүлдезинге үлүүн киириштирерин күзээн.
«Бо чылын школаны 3282 кижи дооскан. Республиканың ниити өөредилге черлериниң үш доозукчузу: Кызылдың президентиниң кадет училищезиниң доозукчузу Глеб Непомнящих химияга, Тываның күрүне лицейиниң доозукчузу Диана Донгак физикага, Кызылдың 11 дугаар школазының доозукчузу Виктория Монгуш орус литературага Чаңгыс аай күрүне шылгалдаларынга 100-100 баллдарны алган» – деп, ТР-ниң өөредилге сайыдының хүлээлгезин күүседип турар Орлан Соян демдеглээн.
2025-2026 өөредилге чылында Чаңгыс аай күрүне шылгалдазының түңнелдери-биле 108 өөреникчи алдын медаль-биле, 102 өөреникчи мөңгүн медаль-биле школаны дооскан.
Тергиин доозукчулар Кызыл болгаш Ак-Довурак хоорайларны, 13 кожуунну төлээлеп келген. Бедик көргүзүглерни чаңчыл ёзугаар Тываның күрүне лицейи, Тываның аграрлыг лицейи, Республиканың лицей-интернады болгаш Кызылдың президентиниң кадет училищези чедип алган. Мурнакчылар одуруунда Кызыл хоорайның школалары болгаш КПКУ турар. Хоорай школалары 40 алдын, 47 мөңгүн медалисти, а КПКУ 14 алдын, 25 мөңгүн медалисти доостурган.
Чайынналчак чедиишкиннерлиг болган бо доозукчуларывыска болгаш 11 чыл иштинде эртем-билиг-биле чүгленген өске-даа уруг-дарыгга чедиишкиннерлиг болуп, эртем далайынга хостуг эжиндирерин күзедивис.
/ Надежда КУУЛАР.
Буян Ооржактың тырттырган чуруу.
“Шын” №28 2026 чылдың июль 23
"Шын" солуннуң МАХ-каналынга каттыжыңар: max.ru/channel_shyn