Бөгүн, май 27-де, Бүгү-россияның библиотека хүнүнде, ТР-ниң Баштыңы Владислав Ховалыг Тываның Корней Чуковский аттыг чаштар болгаш өг-бүле номчулгазының төвүнүң Кызыл хоорайның Московская кудумчузунуң 110 дугаар бажыңында салбырынга аалдап четкен.
ТР-ниң Корней Чуковский аттыг ном саңының директору Сылдысмаа Лопсанның чугаалааны-биле алырга, «Өг-бүле» федералдыг национал төлевилелдиң деткимчези-биле септелгени кылган. Ниитизи-биле 3 сая 800 муң рубльди чарыгдаан.
«К.И. Чуковский аттыг уругларга ном саңы Кызыл хоорайның Московская кудумчузунуң 110 дугаар бажыңында салбыры 2003 чылда бо Московская 110 дугаарлыг бажыңны туткаш дужаап турда, ном саңы база деңге ажыттынган. 23 чыл болганда библиотека чаарттынгаш, «Чаштар болгаш өг-бүле номчулгазының төвү» кылдыр ажыттынып турары бо. План езугаар 2026 чылдың октябрь 1-де дужаар тургаш, тудугжуларның шалыпкын ажылының түңнелинде ажылды эртежик дужаапты. Июнь 1-де, Бүгү делегейниң уруглар камгалалының хүнүнде бичии номчукчуларывыска байырлыг ажыдыышкынны организастаар бис» – деп, Сылдысмаа Лопсан чугаалады.
Регионнуң Баштыңы Владислав Ховалыг чаарттынган ном саңын сонуургап көргеш, «Эки» деп үнелелди бергеш, ном саңынга хол белээн сунган.
«Тергиин чараш болгаш уткалыг кылдыр эде тургускан төп-түр. Бичии номчукчуларга эптиг байдалдарны тургусканы кончуг эки-дир. Ном саңының эң-не идепкейлиг номчукчулары-биле база ужуражып чугаалаштывыс, шай-даа иштивис.
Национал төлевилелдерге идепкейлиг киржири чугула. Чылда 20-даа чедир шак бо төлевилелге киржип болур болганда, республиканың 170 библиотеказы чылдың-на оочурлап алгаш, документилерин чыып, мөөрейге киржип, федералдыг деткимчени алгаш септенир болза, магалыг-дыр деп көрүп тур мен.
Бүгү-россияның библиотекалар хүнү болганда республиканың 170 библиотекаларының ажылдакчыларынга улуг чедиишкиннерни, кадыкшылды, өг-бүлелеринге аас-кежикти күзедим!» – деп, В. Ховалыг чугаалады.
Материалды долузу-биле «Шын» солуннуң дараазында үндүрүлгезинден номчуур силер.
Айдың ОНДАР.
Чингис СААЯНЫҢ чуруктары.