Россияга 2025 чылда «Көдээ черниң почтальону» деп мөөрей эрткен. Ук мөөрей почта ажылдакчыларының күш-ажылы, ылаңгыя көдээ черлерде, чугула болгаш хүндүткелдиг деп чүүлдү көргүзер сорулга-биле бүгү чурттуң эң-не тергиин специалистерин чыгган.
Чаа-Хөл суурдан почтальон Саида Дадый бүгү Россияга Тываны төлээлеп киришкен. Саида Донгаковнага почта дээрге чүгле ажыл эвес, а амыдыралының эчис сорулгазы-дыр.
Мөөрейниң регионалдыг чадазынга республиканың 20 тергиин почтальоннары мөөрейлешкен түңнелинде Саида Дадыйны чаңгыс үн-биле соңгаан. Ол бадылаашкынга ооң ажылчын стажы болгаш ажыл-ижинге бердингени улуг рольду ойнаан. Кол-ла чүүл — чаңгыс чер чурттуглары ону эки билир болгаш хүндүлээр. Чаа-хөлчүлерге ол чүгле чагаалар чедирер почтальон эвес, бүгү чаңгыс чер чурттугларынга идегелдиг чөленгииш болгаш буянныг кижи. А коллегалары ооң профессионалчызын, сагылга-чурумнуун база аныяктарга кезээде дузалаарынга беленин үнелеп турар.
«Көдээ черниң почтальону» деп мөөрейниң түңнели 2025 чылдың июнь айда «Россия» национал төптүң бир шөлүнге болган. Ооң организакчылары «Чаңгыс демниг Россия» партиязының «Россияның сууру» төлевилелдиң, Россия Федерациязының сан-чурагай хөгжүлдезиниң база Көдээ ажыл-агый яамыларының деткимчези-биле Россияның почтазы биле Көдээ аныяктарның российжи эвилели болган.
Найысылалче чурттуң бүгү булуңнарындан Калининградтан Алтайга чедир мергежилиниң тергиин төлээлери чедип келген. Олар «Россияның көдээ черниң тергиин почтальону–2025» деп ат дээш мөөрейлешкен.
Саида Донгаковнага чурттуң найысылалынче чедери ёзулуг ажыдыышкын болган. Ол Москваны бир дугаар көрген. Ол ышкаш өске регионнардан коллегалары-биле таныжар база улуг хемчегге киржир аргалыг болган. Бодунуң белеткеп алган видео-таныштырылгазын төрээн тыва дылынга төлептиг бараалгаткан.
Көдээ черге почтальоннуң ажылы — онзагай хүлээлге-дир. Ол чүгле корреспонденция чедирер эвес, а кижилер-биле дириг харылзаа-дыр. Ол дээрге медээлер тарадыр үн база хереглелдиг кижилерге деткимче көргүзер хол-дур. Шак-ла ындыг харыысалгалыг үзел бодал-биле Саида Донгаковна он-он километрлерни эртип чорааш, кандыг-даа агаар-бойдуста чаңгыс чер чурттугларынга чугула документилерни болгаш пенсияны чедиреринден аңгыда, бодунуң буянын сөңнеп чоруур.
Ооң ажыл-ижинге бердингенин төлептиг кылдыр үнелээн. Онлайн-бадылаашкынның түңнелинде «Чоннуң почтальону» деп номинацияга Тыва Республикадан Саида Дадый эң-не тергиин беш почтальоннуң аразынче кирген. Ол чедиишкин ооң хөй чылдарда үре-түңнелдиг ажылының үнелели-дир. Саида Донгаковна почта адырынга 20 ажыг чыл бараалгаан, республиканың чурттакчылары бо эң-не чугула мергежилге хүндүткелди болгаш демниин көргүзүп, чаңгыс чер чуртуун идепкейлиг деткээннер.
«Чаңгыс чер чурттугларым деткимчези-биле бо мөөрейде киржип тур мен. Суурувуста солун чагыдып ап турар, чагаалар ап турар улузувус хөй. Ынчангаш хүнде эвээш дизе-ле 20 хире бажыңга, изиг-соок, малгаш-чаъс дивейн, солун-сеткүүлдер, чагааларны үе-шаанда чедирип турар мен. Ылаңгыя кижилерге солун медээлерни, хоочуннарга пенсиязын дыка чедирип бериксээр мен. Ынчангаш ажылымга дыка ынак мен» — деп, Саида Донгаковна бодун таныштырган.
/ А. СОЯН белеткээн.
Чурукту маадырның архивинден алган.
“Шын” №14 2026 чылдың апрель 16