(Тыва улустуң тоолу)
Шаг шаанда Теве, Буур, Аът үжелээ кожа-хелбээ, эп-найыралдыг, хову чурттуг өңнүктер бооп чурттап чорааннар-дыр эвеспе. Бир-ле катап Буур мынча дээн:
–Эргим хүндүлүг Теве эжим, меңээ мыйызың ачыладып көрем. Даарта тайгада бүгү аңнарның улуг чыыжы болур дээн-дир. Оон келгеш-ле мыйызың дораан дедир эгидип бээр мен.
Тевениң мыйызын ачылап алгаш, Буур ол хевээр ховуже ээп келбейн, тайгада чурттап артып калган. Теве күжүр оон эгелеп мыйыс чок арткан. Шимчеп чоруур чүүл бүрүзүн ол кайгап туруп алыр чаңчылдыг апарган. Мыйызын ачылап аппарган Буур кажан-на чедип келир ирги дээш, көрзүнүп, дилегзинип чорууру ол.
Буурну аңнаары белен деп аңчылар чугаалажыр. “Мыйызын негеп, Теве кажан-на сүрүп кээр ирги?” деп сестип, кел чыдар ол эвес ыйнаан дээш, шимчеп чоруур дириг амытан бүрүзүн топтап көөр апарган дээр чүве. Ынчап кайгаттынып чорааш, аңчыларга бо-ла чиш болу бээр.
Шаг шаанда Тевениң кудуруу черге дөжелип чораан чүве-дир. Ховуга кады чурттап чораан эжи Аът бир-ле катап: “Бурган ораны баргаш келийн, каас-чараш кудурууң биче када ачыладып көрем, өңнүк” – деп ээрежип тургаш, ачылап алгаш, ол хевээр келбейн барган. Теве сүрүп чеде бээрге: “Даарта бодум аппарып бериптер мен” – дээш, мегелеп чылдырып-ла турган. Шак ынчалдыр Аът Тевениң кудуруун бо хүнге чедир бербээн.
«Шын» №67 2023 чылдың сентябрь 9