Келир неделяда, июнь 24-түң хүнүнде, Тывага V Делегей чергелиг “Азия төвүнде фанфаралар–2025” фестиваль эгелээр.
Бо удаа ук фестивальды Ада-чурттуң Улуг дайынының Тиилелгезиниң 80 чылынга, Ада-чурттуң камгалакчыларының чылынга, Москваның Кызыл шөлүнге Тиилелге парадының эгелээн төөгүлүг хүнүнүң 80 чылынга тураскаадып эрттирер.
1945 чылдың июнь 24-те, шынап-ла, тиилеттирген дайзынның тугу болгаш штандарттары Ленинниң мавзолейинге октаттынган. “Бо Тиилелге парады канчаар-даа аажок улуг ужур-уткалыг болгаш кажан фашизм бажын катап көдүрүп турар үеде кончуг чидиг болур” – деп, организакчылар демдеглээн.
Фестивальга Россияның, Казахстанның болгаш Моолдуң билдингир хөгжүмчү болгаш үрер хөгжүм коллективтери киржир. Фестивальдың программазынче дараазында хемчеглер кирип турар: Тиилелге шөлүнге Мөңге отка чечектер салыр байырлыг ёзулал, Тыва Республиканың Чазааның үрер хөгжүм оркестриниң Казахстан Совет Социалистиг Республиканың улустуң артизи Роза Рымбаева-биле кады бараалгаары, плац-концерт болгаш киржикчилерниң чаңгыстап ырлаары, Тываның үрер хөгжүм оркестриниң “Тиилелгениң попурризи”.
Үрер хөгжүм оркестрлери Арат шөлүнге бараалгаар. Фестивальдың шупту хемчеглеринче кирери төлевир чок.
Бистиң корр.
Чурукту архивтен алган.
“Шын” № 23 2025 чылдың июнь 19