Тываның Чазааның деткимчези-биле «Бүгү чүүлдү Тиилелгеже!» деп акция республикада уламчылап турар. Бо хүннерде чоннуң чыып турары гуманитарлыг дузаны апрель 30-де аъткарар. Аңаа чедир таптыг-ла ийи хонук артканы бо.
Тускай шериг операциязында чаңгыс чер чурттугларга ачы-дуза чедирер буянныг үүлеге үзүк-соксаал чок киржип турар албан черлерин демдеглээри чугула.
Апрель 28-те Өвүр, Сүт-Хөл, Эрзин дээш өске-даа кожууннарның, Федералдыг суд пристав албанының Тыва Республика талазы-биле эргелелиниң төлээлери дээш өске-даа албан черлери чоннуң чыгган гуманитарлыг дузаны Тывада Улусчу фронтунуң төлээлеринге дамчыдып тур.
«Тускай шериг операциязы эгелээрге-ле, коллегаларывыс-биле гуманитарлыг дузаны чорудуп эгеледивис. Мотоциклдер, дроннар, квадрокоптерлерни саткаш, дайынчыларже чорудуп турар бис. Бо удаада коллегавыс чораан дайынчының адрестиг чагыы-биле «Мавик-3» деп дронну садып эккелдивис. Сөөлгү үндүрүлгениң шынары эки дрон дээрге албан-биле бо марканы саткан бис» – деп, Федералдыг суд пристав албанының Тыва Республика талазы-биле эргелелиниң удуртукчузунуң дузалакчызы Маргарита Шумакова чугаалады.
Сүт-Хөл кожууннуң чагырга даргазының оралакчызы Диана Ондарның тайылбырлааны-биле алырга, моторлуг хирээлерни, инвенторлуг генераторларны, ээриил ээрер бүрүн дериг-херекселди, аъш-чем аймаан болгаш камуфляж четкилерни эккеп хүлээткен.
«Чук хууңнарда изиг шайга булгап чиптеринге белен кылдыр чигирлээн, ааржылаан, саржаглап каан тыва далганны уруп эккелдивис» – деп, Диана Ондар демдегледи.
«Ак-Даш сумузу база ТШО эгелээнден бээр гуманитарлыг дуза чыырынга аажок идепкейлиг киржип келген. Бо удаада ак-дашчылар 50000 рубльди чыггаш, ийи моторлуг хирээни, генераторну, рацияны саткаш, хүлээдип турарывыс бо. Чыылда санында идепкейлиг киржип турар чаңгыс чер чурттугларымга четтиргенимни илередир-дир мен» — деп, Сүт-Хөл кожууннуң Ак-Даш сумузунуң чагырга даргазы Таиса Ондар дыңнатты.
Республиканың аңгы-аңгы булуңнарындан чоннуң чыып эккеп турары гуманитарлыг дузазын узун орукче аъткарарынга белеткээри-биле волонтержулар дүн-хүн чок ажылдап турар. Оларның бирээзи Бии-Хем кожуундан келген Алдын Маады.
«Чондан чыып эккелген гуманитарлыг дузаны беш аңгы кезекке чарып аайлап турар бис. Оларның аразында адрестиг чагыглар база хөй. Оларны база удур чаңгыс аайлап турар бис. Мен бир дугаар волонтёрлап чедип келдим. Бөгүн ийи дугаар хүнүм-дүр» – деп, Алдын Маады чугаалады.
Чүгле албан черлери, кожууннар төлээлери эвес, а хууда кижилер база адрестиг гуманитарлыг дузазын хүлээдип турар. Оларның бирээзи Владимир Семис-оол өг-бүлези-биле кады келгеш, суг сордурар мото-помпа деп херекселди болгаш өрт машиназының шлангазын эккелди.
«Бодум болза ИХЯ-ның хоочуну кижи мен. Оглувус 2024 чылда бодунуң күзели-биле керээ чарып алгаш, тускай шериг операциязынче киржип чорупкан. Суг сордурар мото-помпа болган болза деп күзелин илереткен. Өг-бүлевис-биле дайынчы хөделиишкиннер девискээринде оолдарга дузаны өйлеп-өйлеп шыдаар шаавыс-биле чорудуп турар бис» – деп, Владимир Семис-оол тайылбырлады.
Чоннуң чыгганы гуманитарлыг дузаны Донецк, Луганск, Запорожье, Херсон областарынче Улусчу фронтунуң Тывада салбыры организастап чедирер.
Гуманитарлыг дуза чыылдазынга кады демниг киржип, Тиилелгени чоокшуладырынче Улусчу фронтунуң Тывада салбыры кыйгырып турар.
Дараазында адрестерге деткимчени эккеп болур:
Чүлдүм кудумчузунуң 40а дугаар бажыңы, Ленин кудумчузунда 5 дугаар бажыңда ТывКУ-да "Кады бис" штавы.
Улусчу фронтунуң Тывада салбырының социал четкилерде арыннарынче адаанда адрестерже базыпкаш, кирип ап болур.
Айдың ОНДАР.
Ада ТЮЛЮШТУҢ тырттырган чуруктары.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...