Тиилелгени эккелзин дээш …

Тускай шериг операциязында киржип турар чаңгыс чер чурттугларывыска боттуг дузаны чүгле Тывадан эвес, а Россияның өске-даа регионнарындан чедирип турар. Ынчалза-даа ук операция уламчылап турар болганындан, материалдыг болгаш моральдыг деткимче ам-даа херек. Ынчангаш Россияның Улусчу фронтузу болгаш «Россияның демир-оруктары» акционерлиг ниитилел «Автопоезд» деп акцияны чарлаан.

Тускай шериг операциязында киржип турар чаңгыс чер чурттугларывыс дайынчыларга дуза кадар ажылдарны организастаары-биле, ТР-ниң Баштыңы Владислав Ховалыг регионга штаб хуралын эрттирген. Аңаа Тывада хөй-ниити организацияларының, сайгарлыкчы ниитилелдериниң, албан-черлериниң төлээлери киришкен. Улусчу фронтунуң Тывада күүседикчи комитеди “Автопоезд” акцияны деткииринче республиканың хөй-ниитизин кыйгырып, ТДО-да киржип турар чаңгыс чер чурттугларывыс дайынчыларга кончуг херек, берге оруктарга чоруп шыдаар машиналарны, квадроциклдерни белеткээш, чорударын саналдаан турган.

Акцияга киржир күзелдиглерниң саны хүнден хүнче илереп, тускай шериг операциязынче чорудар техниканың түңү немежип олурар. Кызыл хоорайның чурттакчызы Владимир Федосовский «Автопоезд» акцияга киржип, бодунуң ГАЗ-69 маркалыг автомашиназын белекке берген.

- Сес чыл бурунгаар авторалли спортунга сонуургалым оттуп келгеш, бо автомашинаны кылып алган мен. Алыс боду 50 чылдарда-ла үнген эрги машина-дыр. Хөй катап септеп, чаартып каапкан. Өзээ ГАЗ-69 маркалыг-даа болза, амгы үеге чедир хөй катап септеп, чаартып каапкан. Орук чок черлерге чоруур кылдыр эде кылып каапкан мен. Ажыы-биле чугаалаар болза, бодум холум-биле чыып алган машинам-дыр ийин. Бо машина-биле Красноярск крайга, Абаканга, Тывага дыка хөй мөөрейлерге тиилелгелерни чедип турдум. Дыка күштүг машина чүве. Хөй-ле медальдарны кады чаалап турдувус. Ам бо үеде, бодаарымга, тускай шериг операциязынга машинаның ажыын көргүзери чугула-дыр. Ынчангаш ТШО-да чаңгыс чер чурттугларывыска орук чок черге халдыр техника чугула херек деп билгеш, белекке берип тур мен. «Актап» каан дег, доктаамал тиилелге эккээр техника боорга, тускай шериг операциязынга хензиг-даа болза, үлүг-хуузун киириштирип, тиилелгени эккелзин дээш, берип тур мен» - деп, Владимир Федосовский чугаалады.

Узун орукче аъттаныр бетинде ГАЗ-69-ту шеригжиди эде кылыры планда көрдүнген.


А.ОНДАР.
Ада Тюлюштуң тырттырган чуруктары.