Апрель 15-те найысылал Кызылдың төвүнде тыва эки турачыларның тураскаалының чанынга Ада-чурттуң Улуг дайынынга Тиилелгениң 80 чылдаан оюнга тураскааткан «Тиилелгениң эстафетазы» акцияны хүлээп алыр байырлыг езулал болган.
Республикага эстафетаның им-демдээ— кызыгааржының чагызының македин эккелген. Ол улаштыр Тываның кызыгаар чоогунда кожууннарынче чоруур. Шериг-патриотчу болгаш культура хемчеглерлиг акцияны апрель 17-де Алтай Республиканың кызыгааржыларынга хүлээдир.
Байырлыг чыскаалга Тываның Чазак Даргазының оралакчызы Орлан Сарыглар сөс алгаш, Россияның Федералдыг кызыгаар албанының Тыва Республика талазы-биле эргелелиниң ажылдакчыларынга оларның келир салгалга патриотчу кижизидилгезинге болгаш төөгүлүг сактыышкынны кадагалап арттырарынга киирген үлүг-хуузу дээш четтиргенин илереткен. Ол ышкаш Ада-чурттуң Улуг дайынының чылдарында кызыгааржылар бир дугаар хүнден эгелээш туруп көрбээн эрес-дидим чоруун көргүскенин ол демдеглээн.
«Төрээн чуртунуң бичии кезээн безин дайзыннарга бербейн, чайгылыш чок бирги одуругга тулчуп турганнар. Дыка хөй кызыгааржылар дайын соонда чылдарда-даа Тываның девискээринге хүлээлгезин күүседип турганнар. Амгы-даа үеде кызыгаарга албан-хүлээлге эрттирери эң-не дидим кижилерниң хүлээлгези болуп артпышаан, шериг акы-дуңмалышкы чоруктуң школазы-дыр. Ынчангаш кызыгааржылар чуртувустуң хөй национал чонунуң хүндүткелин болгаш өөрүп четтириишкинин чаалап алганнар» — деп, Орлан Сарыглар чугаалаан.
Митингиниң киржикчилериниң мурнунга Россияның Федералдыг кызыгаар албанының Тыва Республика талазы-биле эргелелиниң даргазы Владимир Матвеев база сөс алган. Акцияның кол сорулгазы — Ада-чурттуң Улуг дайынынга Тиилелгениң төөгүлүг ужур-утказын суртаалдаары-дыр деп ол тайылбырлаан.
«Тиилелгениң эстафетазы» акы-дуңмалышкы күрүнелер-биле кызыгаарлашкак Төп, Мурнуу, Чөөн болгаш Барыын кызыгаарларже уламчылап чорааш, май 28-те Москвага чедер.
Бистиң корр.
Чуруктарны ТМГ-ден алган.
“Шын” №14 2025 чылдың апрель 17