Тиилелгеже бурунгаар!

Совет Тываның 5 чыл аттыг стадионунга I дугаар Чайгы спартакиаданың байырлыг ажыдыышкыны болуп эрткен. Тываның кожууннарындан шилиндек командалар найысылалга түңнел оюннарга адааннажыры-биле чыглып келген.

Тываның спорт сайыды Субудай Монгуштуң дыңнадыы-биле, спортчу оюннарны 4 аңгы назы-харга хуваап, 9 аңгы хевирге эрттирер. Бир командада назы-хар болгаш спорт хевириниң аайы-биле 448 кижи киржип турар. Республика деңнелдиг улуг хемчегде ниитизи-биле 17 кожуундан 7500 ажыг кижи киржип турар. Оларның шуптузу – суму болгаш кожуун чадазының оюннарынга тиилеп үнгеш, күштүглерниң күштүглери, шыдамыктарның шыдамыы болган, шыңгыы шилилгени эрткен шылгараңгай спортчулар келген дээрзи чугаажок.

ТР-ниң Чазак Даргазының социал политика талазы-биле оралакчызы Орлан Сарыглар республиканың удуртукчузу Владислав Ховалыгның өмүнээзинден спортчуларга байыр чедирип, хемчегниң хүндүлүг аалчызы болган. Ук спортчу байырлал Россияда Күш-культура болгаш спорт талазы-биле күрүне албан чериниң тургустунганындан бээр 100 чыл болуп турар чылында база Тывада демниг чорук болгаш эп-сеткил каттыштырылгазының чылынга эрттирип турарын ол онзалап демдеглээн.

Башкының болгаш дагдыныкчының чылында бичии болгаш элээди спортчуларны кижизидип чоруур тренер башкыларга хүндүткел ёзулалынга шөлдүң ортузунга Олимпиадының сүлдези 5 аңгы өңнүг төгерикти көргүзери-биле тыва хүреш тренери Кайгал-оол Донгак, гимнастика тренери Алёна Удод, дзюдо тренери Владислав Монгуш, ча адар спорттуң тренери Елена Достай, хол бөмбүүнүң тренери Тараачы Хомушку элээди спортчулары-биле кады үнүп кээп, спортчу байырлалды каас-чараш аян киирген.

I дугаар Чайгы спартакиаданың тугун Тывадан бир дугаар ССРЭ-ниң спорт мастери Өргелээр Ондар, бир дугаар алдарлыг спорт мастери Александр Доржу, Чаан мөге Сайын-Белек Тюлюш база Тывадан бир дугаар олимпийжи хүлер медальдың эдилекчизи Артас Санаа шөлче үндүрүп эккелгеннер. Ону спорт сайыды Субудай Монгуш киискидип көдүрген.

Командалар аразындан Чөөн-Хемчик кожууннуң төлээзинден оларның белеткелиниң дугайын сонуургадывыс.

– Төөгүде I дугаар эртип турар Чайгы спартакиаданың байырлыг ажыдыышкынында 30 төлээ болгаш 25 көрүкчү келдивис. База ол ышкаш 4 аңгы назы-хар бөлүүнге 9 аңгы спорт хевиринге ойнаары-биле 448 спортчу келген. Кожууннар аразынга янзы-бүрү спорт хевирлеринге маргылдаалар удаа-дараа болуп турар болгай. Оюннар элээн дүшкүүрлүг, дыңзыг болуру чугаажок. Чөөн-Хемчик кожуунда спортка сундулуг улуг-биче чон хөй. Түңнел оюннарга тиилээр сорулгалыг сумулар болгаш кожуун иштинге шыңгыы шилилгени эрттирген бис. Серемчилелди хензиг-даа кошкатпайн, тиилелгеже бурунгаарлаарын кызыдар бис – деп, Чадаанада Чечен-оол Монгуш аттыг олимпийжи курлавырлар школазының директору Айдыс Ооржак чугаалаан.

Июнь 7-ден июнь 18-ке чедир ийи неделя дургузунда 9 аңгы спорт хевири – хол бөмбүү, чиик атлетика, ГТО, шыдыраа, шашки, стол теннизи, гиря көдүрер спорт, баскетбол база биче бут бөмбүүнге командалар күчү-күжүн болгаш аваангыр-кашпагайын шылгап, адааннажыр.

– 14 хонук дургузунда спортуң янзы-бүрү хевирлеринде ойнап турар чаңгыс чер чурттугларыңар дээш аарып, олар-биле кады өөрүп-хөглеп алырыңарны кыйгырдывыс. Тиилекчилер I дугаар Чайгы спартакиаданың төөгүзүнге боттарының аттарын арттырып каар. Мооң соңгаар ук спартакиаданы ийи азы үш чылда 1 катап эрттирериниң дугайын Тываның Баштыңы-биле сүмележир бис. Ол ышкаш кышкы спартакиаданы эрттирерин өөренип турар бис» – деп, спорт сайыды Субудай Монгуш медеглээн.

Спартакиаданың шаңналдары шыырак: тиилээн кожуунга ангарлыг хевирниң спортчу залын, II-ги черниң шаңналынга ногаан кылымал шыктыг бут бөмбүүнүң шөлүн, III-кү черниң шаңналынга спортчу шөлчүгешти тудары көрдүнген. Чаңгыстың спортчу оюннарының тиилекчилеринге акша шаңналдарын тыпсыр.

/ Алиса ДОНГАК.
Буян ООРЖАКТЫҢ тырттырган чуруктары.