Тываның хоорай, суурларында чаа хөй-ниити девискээрлери немежип, тудуглар уламчылап турар. Чижээлээрге, Ак-Довурак хоорайга бо чылын улуг чаартылгалар болур. Хоорайның Центральная кудумчузунуң хевири амгы үении-биле өскерлир – ону чаңгыс аай дизайн-биле шимеп каастаар, чаа арт-объектилер, фотозоналар-биле дериир.
«Чурттаар оран-сава болгаш хоорай хүрээлеңи» национал төлевилел-биле таарымчалыг хоорай хүрээлеңин тургузар эң-не тергиин төлевилелдерниң VIII Бүгү-российжи мөөрейинге улусчу бадылаашкынга тиилекчилер санынче эрткен чылын Ак-Довурактың «Ак тоолчургу чугаа» төлевилели кирген. Бо мөөрей 2018 чылдан тура Россияның Президентизи Владимир Путинниң даалгазы-биле эртип турар. Ону 200 муңдан эвээш эвес чурттакчылыг Россияның биче хоорайларын, ол ышкаш федералдыг болгаш регионалдыг ужур-уткалыг төөгүлүг суурларны деткиир сорулга-биле тургускан.
Ак-Довурак хоорай чагыргазының архитектору Саглай Сединиң чугаазы-биле алырга, төлевилелде темалыг кирер зона, агаарлаар чараш орукчугаштар, дыштаныр черлер, амгы үениң спорт шөлү, ол ышкаш К. Сагды аттыг культура ордузунуң мурнунда шөлдү чаартыры көрдүнген.
Төп кудумчуже кирип келген кижиге ёзулуг тоолчургу оран сагындырар кылдыр чогааткан. Аң дүрзүлерин кылган биче архитектурлуг хевирлер турар: спортчу шөлге сарлык дүрзүлүг индир, а бичии уруглар ойнаар шөлге хой дүрзүлүг чуңгулаар тейжигеш дээш оон-даа өске.
Төлевилел 2025 чылда боттаныр. Түңнелинде Ак-Довурак хоорайның Центральная кудумчузу катаптаттынмас кылдыр өскерлип, чурттакчы чонга таарымчалыг девискээр болур.
Ооң-биле чергелештир Чадаана хоорайга база бо чылын чаагайжыдылга эгелээр. Ниитизи-биле «Таарымчалыг хоорай хүрээлеңи» национал төлевилел-биле бүгү республикага 30 ховар дээн дыштанылга зоналары немежир.
А. СОЯН белеткээн.
Чуруктарны интернеттен алган.
“Шын” №15 2024 чылдың февраль 28