Сүт-Хөл кожууннуң Алдан-Маадыр суурнуң хоочуннары июль айда Азас хөлге дыштаныры-биле чоруптувус. Хоочун чолаачылар Александр Данзы-Белекович биле Гагарин Назын-оолович бисти чедирип, дыштандыргаш келгенинге дыка-ла өөрүп тур бис.
Суурда хоочун башкывыс Клавдия Социаловнаның удуртулгазы-биле тоолзуг чараш оранга чедип, харын-даа Ногаан-Хөлдүң аржаанын ижип, кирип ап, дыка-ла эки дыштандывыс.
Хоочун хемежи бисти Азас хөлдү долгандыр агаарладып, бичии ортулуктарны тайылбырлап бергени дыка-ла сонуурганчыг болду. Балыкчылар келгеш, биске балыын-даа эккеп берип турду. Кежээки чем соонда солун чугаалажып, аян тудуп ырлажырывыска, дыштанып келген аалчылар бисти чаптап, кежээ дургу сонуургадылар.
Суурувустуң хоочун башкызы Урана Токпак-ооловнаның черле дыл башкызы болгаш төөгү билирин магадап, аай-дедир узун оруктуң эрткенин-даа эскербедивис. Суурунуң келир үези, чону дээш ажылдап чоруур башкывыска чоргаарланып чоруур бис.
Хоочуннар, бис, ырак кылаштаарывыс берге болгаш, Ногаан-Хөлдүң аржаанынга чүдүп-тейлеп алганывыска канчаар-даа аажок өөрүп турдувус. Ынчангаш бисти мындыг чараш оранга чедиргеш келген башкывыска — Клавдия Социаловнага база чолаачыларга черге чедир мөгейип, четтиргенивисти илередип тур бис.
Тамара МАРТАА.
Чурукту авторнуң архивинден алган.
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn