Республикаларның школаларында Чаа чыл байырлалдарын эрттирип эгелей берген. Оларның бирээзи Кызыл хоорайның 11 дугаар школазында база класстар аайынче байырлалдар 22-ден 25-ке чедир уламчылаар. Бо школада чыл дургузунда болуп эртер байырлалдарны организастап эрттиреринге класс бүрүзүн киириштирип турар. Ол талазы-биле графикти база тургускан. Бо удаа 7-ги болгаш 10-гу класстың өөреникчилери эге класс өөреникчилериниң байырлалдарын класс аайы-биле үлежип алгаш эрттиргеннер.
7 “д” класстың башкызы Екатерина Болод эге класстарда өөренип турар дуңмаларынга байырлалдар эрттирген өөреникчилериниң дугайында өөрүшкү-биле чугаалаан: “Бо чылын бис эге школага Чаа чылдың кайгамчык тоолзуг көргүзүүн бараалгадыр аас-кежиктиг болдувус. Мээң чедиги классчыларымны байырлал эрттирер силер дээрге, изиг күзели-биле дилегни хүлээп алдылар. Класс-даа, школа-даа иштинге хемчеглер болурга, дендии идепкейжи, хөглүг уруглар болгай. Ооң соонда дораан-на канчаар эрттирерин чугаалажып, идепкейлиг ажылдап кириптивис”.
Байырлал эрттиреринге белеткел ажылы берге-даа болган болза, шыдапканын класс башкызы демдеглээн: “Аңаа белеткенири амыр эвес болду. Бергелер турган, ажып эртиптивис. Ылаңгыя маадырларга идик-хеп тывары берге болду. Школаның костюмнарының аразындан алгаш, чамдыызын уруглар боттарының ада-иелери-биле база даарап шеверлээн. Школа база дузалажып турган”.
Екатерина Болод өөреникчилерин ёзулуг-ла актёрлар деп үнелээн: “Олар сценарийге ойнаарынга аажок ынак. Бо хүн дургузунда хары угда 6 байырлалды эрттирип кааптывыс”.
Өөреникчилерни школаның байырлалдарын эрттиреринче хаара тудуп турары кончуг эки деп ол санап турар. Оларның актёр салым-чаяаны ажыттынып, чогаадыкчы талалары сайзырап, чугааланып база өөренип турарлар. Ынчангаш ол кончуг эки бодал дээрзин класс башкызы демдеглээн.
9–11-ги класстарга “Ак-көк отчугаш” кылдыр байырлалдарны эрттирген дээрзин школаның кижизидилге талазы-биле директорнуң оралакчызы Сылдысмаа Хөлбең дыңнаткан. Ол ышкаш кышкы дыштанылга үезинде класс башкылары өөреникчилери-биле кады “Сүбедей” спорт комплекизинче, “Найырал” кинотеатрынче, малгаштан савалар кылыр студияже дээш оон-даа өске үнүүшкүннерни класс бүрүзү тус-тузунда кылырын планнап турар. Доозукчу класстарга шылгалдаларга белеткенир үени база тодаргайлаан.
Чыжыргана СААЯ.
Авторнуң тырттырган чуруктары.
“Шын” №50 2025 чылдың декабрь 25