Ырак-узак Тожу кожуунда амгы үеге дүүштүр кылган 9 сая рубль өртектиг “Карс” деп рентген аппарады ажылдап эгелээн. Россияга кылган чаа аппаратты “Кадык камгалалы” национал төлевилел-биле эге чаданың эмнелге албан черлерин чаартыр программа ёзугаар алган.
Амгы үениң чурагайлыг дериг-херекселинге хамааржыр эвээш хемчээлдиг херел-биле шинчилге кылыр чаа рентген аппарадын эрткен неделяда хандырыкчы фирманың инженери эмнелгеге салып белеткээш, эмнелгениң специалистеринге ооң-биле канчаар ажылдаарын көргүзүп, өөреткен. Ооң соонда ук кожууннуң чурттакчылары бо хүннерде рентген шинчилгелерин эртип эгелээн.
Кожууннуң рентген лаборантызы Антон Чылбогаш эмчиниң чаа дериг-херексели делгем диапазоннуг шинчилелдер кылыр аргалыын, тырттырарының бедик шынарлыын демдеглээн. Ол ышкаш хөрек тырттырарындан аңгыда, баш сөөгү, думчук, моюн болгаш көп-белдирни, оорга сөөгүн тургузу хынаптар болгаш эвээш хемчээлдиг херелге таварыштырар аргалыг.
Тожунуң төп кожуун эмнелгезинде көжүп чоруур ФГ-аппарат база ажылдап турар. Ол рентген аппаратка эмчилер аарыг улустуң буттар сөөктерин шинчилеп турар.
Ук кожуунга шак мындыг чаа үеге дүүштүр кылган эмчиниң өске-даа чугула дериг-херекселдери-биле хандырылга үстүнде айыттынган программа-биле келир 2023 чылдың дургузунда уламчылаар.
Сорунза Монгуш белеткээн.
Чурукту интернеттен алган.