Октябрь 3-те Тожу кожууннуң Доора-Хем суурунга Россияның социал фондузунуң Тыва Республикада салбырының клиентилер албанынга Улуг назынныгларга харылзажыр төптүң ажыдыышкыны болган. Ам регионда Социал фондунуң эгелекчи төлевилелиниң тургусканы шак ындыг харылзажыр төптерниң саны 11 четкен.
Байырлыг ажыдыышкынга ТР-де Социал фонд салбырының удуртукчузу Светлана Кенден, Тожу кожууннуң Төлээлекчилер хуралының баштыңы Аяс Кашкак, хоочуннар организацияларының, социал камгалал, өөредилге, культура болгаш спорт албан черлериниң төлээлери, суурнуң чурттакчы чону кээп киришкен.
“Төптүң ажыдыышкыны-биле байыр чедирбишаан, Тожу кожууннуң улуг назынныг чонун ооң амыдыралынга идепкейлиг киржип, сонуургалдарыңарның аайы-биле эш-өөрден тып алырыңарже чалап тур бис. Доора-Хемде чаа шөлчүгеш мөңгүн назынның хамаатыларынга чыглып чугаалажыр, чогаадыкчы деңнелин бедидер чери апаарынга бүзүреп тур бис. Төлевилелдиң боттанып келген 2 чылының дургузунда бистиң төптерге Тываның 15 муң ажыг чурттакчыларының киржилгези-биле 1600 ажыг хемчеглер болуп эрткен” – деп, Светлана Кенден чугаалаан.
Чалаткан аалчылар Социал фонд салбырынга кожууннуң улуг назынныг чону хостуг үезин ажыктыг эрттирер черни ажыдып бергенинге өөрүп четтиргенин илереткен. Олар төптүң ажылынга бүгү талалыг деткимчезин чедирерин аазааннар.
Доора-Хемден «Тоора-Хемочка», “Отчугаш”, Адыр-Кежигден “Өдүген”, Ийден “Ачымак” хоочуннар ансамбльдериниң бараалгааны байырлалдың ёзулуг каасталгазы болган.
Ук төп Клиентилер албанының 2 оран-савазында турар. Оларның бирээзин компьютерлер-биле дерээн, шыдыраа, шашки ойнаар, шайлаар черлер бар. Өскезинде фитнес болгаш танцы залы бар.
Төп культура болгаш спорт албан черлери, социал камгалал эргелелдери, хөй-ниити каттыжыышкыннары, эмнелгелер, чээли албан черлери-биле кады ажылдаар. Ук албан черлериниң төлээлери чурум ёзугаар пенсионерлерге лекциялар, тренингилер, эмчи шинчилгелерин эрттирер.
Чаа Улуг назынныглар төвү чурум ёзугаар клиентилер албанының дараазында адрезинге ажылдаар: Доора-Хем суур, Комсомольская кудумчузу, 31 дугаар бажың.
Россияның социал фондузунуң ТР-де салбырының медээзинден Чыжыргана СААЯ белеткээн.
“Шын” №77 от 2024 чылдың октябрь 9