Президент Владимир Путинниң эгелээни «Узун болгаш идепкейжи назын» национал төлевилели-биле кадык камгалалының бирги звенозун чаартыр программаны боттандырып, бо чылын Тываның Тожу кожууннуң элээн каш суурларында эмнелге албан черлери чаарттынып турар. Чазылары, Ий, Адыр-Кежиг суурларда чаа фельдшер-акушер пунктуларын тудар, а кожуун төвү Доора-Хемде төп кожуун эмнелгезин бүрүнү-биле септээр ажылдар чоруп турар.
Тудуг организациязы-биле чарган керээде септелгеден аңгыда, чоок-кавы девискээрлерин чаагайжыдар болгаш ногаажыдары база кирген.
Чазылары суурда ФАП тудуун ажыглалче кииреринге белен. Тудуг ажылдары доозулган, эт-септи болгаш дериг-херекселдерни салып, чагыкчыларның сөөлгү сагындырыгларын эдип турар. Чазылары суму чагыргазының даргазы Диана Саин-Белек суурунда чаа ФАП-тың ажыдыышкыны өөрүнчүг болгаш үр үеде манаан болуушкун болган деп демдеглээн.
Ийи суурда чаа ФАП-ты ам-даа тудуп турар. Объектиде ажылдарның 70 хуузу доозулган.
Доора-Хемде поликлиниканың капитал септелгези доозулган. 1936 чылда туттунган тудугга эки септелге чаңгыс-даа кылдынмайн турган. Чай дургузунда поликлиниканың ханаларын болгаш шалазын чаартып, крышазын долузу-биле солааш, суг хандырылга системазын солуп, таваан быжыглааш, даштын чаартып кылган. Республиканың Кадык камгалал яамызының дыңнатканы-биле алырга, федералдыг болгаш регионалдыг ийи программа-биле поликлиниканы септеп турар.
Чаа тудуглар эмнелге ажылдакчыларының-даа, тус черниң чурттакчыларының-даа хей-аъдын көдүргенин Тожу кожууннуң төп эмнелгезиниң кол эмчизи Эрес Куулар демдеглээн. Материалдар чедирери болгаш специалистер хаара тудары-биле холбашкан бергедээшкиннер турза-даа, тожуларга шынарлыг эмчи дузазын алырынга таарымчалыг байдалдар тургустунуп турарын ол демдеглээн.
Бо чылдың эгезинде Тожу кожууннуң чедери берге Ырбан суурнуң 250 хире чурттакчыларынга эмчи дузазын көргүзер чаа фельдшер-акушер пунктузу ажыттынганын сагындыраал. Национал төлевилел күүселдези-биле бо чылын Тывада 10 чаа ФАП, 2 эмнелге амбулаториязын тудуп, кадык камгалалының 5 объектизин септеп чаартып турар.
А. МОНГУШ.
“Шын” №40 2025 чылдың октябрь 16