ТР-ниң Баштыңы Владислав Ховалыг видеодамчыдылга таварыштыр Луганск Улус Республиказындан Тиилелге хүнү-биле республиканың чурттакчы чонунга байыр чед

- Хүндүлүг чонум, өгбелеривис! Тускай шериг операциязының киржикчилери-биле кады база бир онза чугула болгаш эргим байырлалывыс – Улуг Тиилелгениң хүнү-биле чүрээвис ханызындан байыр чедирип тур бис! Биске белек кылдыр тайбың дээрни болгаш төрээн чер чурттувустуң хосталгазын чаалап бергени дээш Ада-чурттуң Улуг дайынының маадырларынга черге чедир күдүк базып, мөгейдивис.

2023 чыл – бистиң республикавыска онзагай чыл. Сентябрь айда Тыва Арат Республика фашистерге удур демисежир дээш Кызыл Шеригге дуза кылдыр эки турачы уругларын болгаш оолдарын фронтуже аъткарганындан бээр 80 чыл оюн демдеглээр.

Тыва Республиканың алдарлыг дайынчы маадырларын амгы үеде аныяк камгалакчы оолдарывыс салгап, төөгүнү уламчылап тур. Ада-чурттуң Улуг дайынының үезинде Тыва Арат Республиканың Кызыл Шеригге дузалажып турганы ышкаш, тускай шериг операциязының эгезинден тура бистиң муң-муң чаңгыс чер чурттугларывыс чуртувустуң хостуг эргези база тайбың ак-көк дээри дээш туржуп турар. Эрес-дидимин болгаш маадырлыг чоруун көргүзүп, амы-тынындан чарылган дайынчы оолдарывыс бистиң чүректеривиске кезээ мөңге маадырларывыс болуп артар.

Биче буурай демниг тыва чонувус Россияда эң-не узун чыскаалдыг, хөй санныг 41 демир аъттарны дайынчыларга дуза кылдыр чоруткан. Бо бүгү буянныг болгаш эрес-дидим үүлеге Тываның чурттакчылары болгаш өреге бүрүзү киржилгелиг. Ол дээрге күштүг болгаш патриотчу чүткүлүвүстүң херечизи. Бүгү тыва чонувуска дайынчы оолдарывыска ачы-дузаңар болгаш деткимчеңер дээш чүрээвис ханызындан улуу-биле өөрүп четтирдивис! Машиналарны оолдарывыска дамчыттым. Олар шупту бүзүрелдиң болгаш алыс шынның девии болзун!

Шаптараазыннар болгаш аар-берге чидириглер таварышса-даа, дөмей-ле тиилелгеже чүткүп чор бис! Алыс шын бистиң талавыста! Хүндүлүг чаңгыс чер чурттугларым, байырлал-биле! Тиилелге хүнү-биле!

А. ДОНГАК белеткээн.