ТР-ниң Көдээ ажыл-агый болгаш аъш-чем яамызы Эрзин кожууннуң малчыннарынга дузаны чедирген

Чоокку хүннерде Эрзин кожуунда чагган хар мал кыштаглаашкынын нарынчыдып турар. Чамдык ажыл-агыйларда мал чеми чедишпейн турар. ТР-ниң Көдээ ажыл-агый болгаш аъш-чем яамызы Фермер талазы-биле сайгарлыкчы чорук болгаш көдээ ажыл-агый кооперативтерин хөгжүдер фонд-биле кады ук кожуунче мал чемин чедирген. ТР-ниң Чазааның курлавыр фондузундан 17 тонна мал чемин чүдүрүп чедирген. Курагинодан немей 40 тонна сигенни база чедирер.

Кожууннуң чагырга ажылдакчыларының дыңнадып турары-биле алырга, “Бай-Хөл”, “Мандала” көдээ ажыл-агый бүдүрүлге кооперативтери болгаш 17 ажыл-агый дуза дилеп келген.

“Малдың чаш төлүн камгалап алыры эң-не кол сорулга. Эрзин кожуунда мал оолдаашкыны ам-даа уламчылавышаан. Үе-шаанда мал чеми-биле хандырары чугула” — деп, мал ажыл-агыйын хөгжүдер килдистиң даргазы Ушпас Куулар чугаалаан.

Көдээ ажыл-агый яамызының медээлеринден.

#Көдээажыл_агый #Кыштаглаашкын #Шынсолун #Тывадыл