Тудуг ажылдары - хыналдада

Чазак кежигүннери Таӊды кожуунда тудугларныӊ ажыл-чорудулгазын эрткен дыштаныр хүннерде хынап чораан.

Кожууннуӊ сайзыралынга ужур-дузалыг объектилерге ТР-ниӊ Чазааныӊ Даргазыныӊ оралакчызы Айдың Чюдюк, Тываныӊ тудуг сайыдыныӊ бирги оралакчызы Салим Санчы, «Күрүне тудуг чагыглары» күрүнениӊ казна албан чериниӊ директору Экер Биче-оол чогуур хыналданы чоруткан.

Ажыл-агыйжы үнүүшкүннүӊ кол сорулгазы 825 олуттуг чаа школа, 250 олуттуг Культура бажыӊыныӊ тудугларын, Бай-Хаактыӊ үш кудумчузунда суг дамчыдар четкини чаартып кылганын хынаары. Чаа школаны «Өөредилге» национал төлевилелдиӊ шугуму-биле, а клубту «Көдээ черниӊ девискээрин комплекстиг хөгжүдери» деп программа-биле кылып турар.

Тудуг объектилериниӊ байдалын көрүп, оларны боттандырары-биле холбашкан чугула айтырыгларны сайгарып чугаалашкан.
Ажыл-чорудулганы экижидер дизе, чүнү кылырын, кандыг бергедээшкиннер барын ылавылап тодарадыр дээш, тус черниӊ чагыргазы болгаш подрядчик организацияныӊ төлээлери-биле ужурашканнар.

«Муниципалитетте тудугларныӊ ажыл-чорудулгазын көргеш, Чазак Даргазыныӊ оралакчызы Айдыӊ Чюдюк болгаш хайгаарал органнарыныӊ төлээлери чүгээр деп үнелээн. Культура бажыӊыныӊ тудуунуӊ темпизинге хамаарыштыр кезек сүмелер берген» – деп, Таӊды кожууннуӊ чагырга даргазы Владимир Сырат чугаалап турар.

«Чаа школа биле культура бажыӊыныӊ тудуу дээрге кожууннуӊ социал хөгжүлдезиниӊ чугула базымнары-дыр. Чоннуӊ амыдыралын сайзыраӊгай бедик деӊнелдиг кылдыр тургузарынга ажыктыг болгаш шынарлыг инфраструктура объектилери-биле хандырар ужурлуг бис» – деп, Айдыӊ Чюдюк демдеглээн.

Хыналда үезинде онза кичээнгейни Бай-Хаактыӊ Шоссейная, Комаров биле Мир кудумчуларында суг дамчыдар четкини чаартып кылганынче угландырган. Ажыл долузу-биле күүсеттинген, ону доосканыныӊ дугайында актыны бо хонуктарда чагырга чери хүлээп алыр дээрзин Владимир Сырат дыӊнаткан.

ТМГ медээлеринден.
ТР-ниӊ Чазааныӊ Даргазыныӊ оралакчызы Айдың Чюдюктуӊ секретариадыныӊ тырттырган чуруу.
"Шын" №91 2024 чылдың ноябрь 27