Тудуг чогуур үезинде доосту бээринге бүзүрел бар.

Тываның кадык камгалал сайыды Анатолий Югай кожууннарда фельдшер-акушер пунктуларының чаа оран-саваларының тудуу кайы хире деңнелде чоруп турарын дыңнаткан:

''Бо чылын бистиң республикада кадык камгалалын чаартырының программазы-биле 6 фельдшер-акушер пунктуларын болгаш эмчи амбулаторияларын тудуп турар бис.

Тудуг ажылының чорудуу-биле хууда таныжып көөрү-биле Каа-Хем кожуунче чедип чордум. Кундустуг суурда чаа, амгы үениң негелдезинге дүгжүп турар фельдшер-акушер пунктузун тудуп турар. Оран-саваның ханаларын тудуп үндүрүпкен, казапчазын кылыпкан, өрээлдээш, иштики ажылдарының баштайгы чадазын доозупкан. Оран-сава ажыглалче киреринге 80 хуу белен. Амгы үеде тудугжулар одалга системазын кылып турарлар. Тудуг чогуур үезинде доосту бээринге бүзүрел бар.

Чоннуң чурттаар назынын узадыр, санын өстүрер, амыдырал-чуртталгазының шынарын бедидер дээн чижектиг национал сорулгаларны чедип алырынче угланган федералдыг программаларның ачызында суурларда фельдшер-акушер пунктуларын, эмнелгелерни чаартып ап турар бис.

Оран-савалары-биле кады эмнелге черлериниң дерилгези база чаартынып турар. Эмнелгелерниң бедик скоростьтуг интернетке коштунганы эң-не ырак, чедип алыры берге булуңнарның чурттакчыларынга эмчилерден телеконсультация алыр арганы берип турар.

Сөөлгү ийи чылда «Кадык камгалалы» национал төлевилелдиң ачызында Тывада 36 фельдшер-акушер пунктулары, эмнелге амбулаториялары туттунган. Бо чылдың төнчүзүнге чедир база 6 объектини ажыглалче киирери планнаттынган''.