Тываның Баштыңы Владислав Ховалыгның хыналдазынче Кызыл хоорайда база Каа-Хем суурда туттунуп турар улуг объектилер кирген. Ол дээрге школалар, чаа тудуглар, спорт-культура төвү болгаш өске-даа объектилер-дир.
Владислав Ховалыгның бир дугаарында четкен кол ийи социал объектилери – Каа-Хем суурда база Кызылда школалар болган. 14 дугаар школа турган черде, «Мөңгүн» микрорайонунда, объектиниң девискээринде чаагайжыдылга, кол оран-савада шеверлел ажылдары чоруп турар. Каа-Хем суурнуң школазында база-ла ол ажылдар кидин түлүк. «Амгы үениң өөредилге албан черлериниң инфраструктуразы көңгүс ылгалдыг. Элээн каш спортчу шөлдерлиг, ногаан зоналарлыг» — деп, Тываның Баштыңы бодунуң блогунда бижээн.
Регионнуң удуртукчузу «Спутник» микрорайонунда тудуп турар чуртталга комплекстериниң бирээзинде 9 каът бажың тудуунга четкен. Ооң даалгазы езугаар девиcкээрниң планын тодарадыр ажылды кылып турар. Тудуг ажылдарында аныяктар идепкейлиг киржип турарын баштың демдеглээн. «Аныяктарывыс төрээн хоорайының эде чаартылгазынга сонуургалдыг болуп, ажылдарда хаара туттунганы эки-дир» — деп, В. Ховалыг демдеглээн.
Тываның Баштыңы Тиилелгениң 75 чыл ою кудумчуну, Полигоннаядан Бай-Хаакская белдиринге чедир, оон улаштыр Кызылдың президентиниң кадет училищезинге чедир орукту калбартыр дугайында планны дыңнаткан. Регионалдыг Орук-транспорт яамызынга чогуур даалганы ол берген. 2026 чылда ажылдар аңаа эгелээр. Бөгүнде ол кудумчуда «Роснефть» компания автозаправка станциязын тудуп турар. Демир-бетон кылыглардан өртке удур камгалалдарны, арыглал тудуунуң тавааның плиталарын база кывар-чаар материалдарга савалар салыр ажылдарны дооскан. Ол-ла компания шак-ла ындыг станцияны Калинин кудумчузунда, хоорайдан Шагаан-Арыг уунче үнер черде, тудуп эгелээн. Келир чылдың мартта чаа заправкалар ажыттынар.
Тываның Баштыңы ол объектилерде ажылдарны хынап чорааш, регионда чуртталга тудуунуң чорудуун тудугжулар-биле чугаалашкан. База ол ышкаш республикага чиигелделиг ипотека программазын узадыр арга-хевирлерни тодарадырының талазы-биле ажылдарны федералдыг яамылар-биле кады чорудары уламчылавышаан деп дыңнаткан. Тываның Тудуг яамызының медээзи-биле алырга, 2024 чылдың тос айларында 315 муң ажыг дөрбелчин метр чуртталга шөлүн туткан азы план 225 хуу күүсеттинген.
Тудуг сезонунуң кончуг шалыпкын үезиниң төнчүзүнге чедир эвээш үе артканын барымдаалааш, харыысалгалыг черлерден ажылчыннар санын база ажылдарның чорудуун онза хайгааралга алырын хыналданың төнчүзүнде Тываның Баштыңы негээн.
ТР-ниң Чазааның парлалга албаны.
Чиңгис СААЯНЫҢ тырттырган чуруктары.
«Шын» №83 2024 чылдың октябрь 30