Тудуглар уламчылап турар.

Бо чылын республиканың хоорай, суурларында чурттаар чаа оран-сава тудуу, школалар, уруглар садтарынга капиталдыг септелгелер дээш өске-даа тудуг объектилери немежип, чыл төнчүзүнге чедир уламчылап кээр.

«Эргижирээн болгаш аварийлиг оран-савадан хамаатыларны өскээр көжүрери» федералдыг программаны боттандырары-биле Хову-Аксы суурда 3 каът 6 бажыңның тудуу кидин түлүк чоруп турар. Ол ажылды «Ника» тудуг организациязы хүлээнип алган. Бо чылдың төнчүзүнге чедир Юбилейная кудумчузунуң 9 биле 13 дугаар бажыңнарының тудуун доозуптар дээрзин ТР-ниң Тудуг яамызы дыңнаткан.

«Өскүстерни чурттаар оран-сава-биле хандырар» деп тускай көрдүнген феде-ралдыг программаны Тываның Чазаа боттандырарын уламчылап турар. Бо чылын план езугаар 162 кижини чурттаар оран-сава-биле хандырар ужурлуг.

ТР-ниң Тудуг яамызы тудуг ажылдарының шынарын болгаш объектилериниң беленин үргүлчү хайгааралда ап турар.

Чөөн-Хемчик кожуунда өскүстерге 8 бажыңның тудуу адакталган. Чадаана хоорайның Радужная 9 биле 11 дугаар бажыңнарының тудуун хуу сайгарлыкчы Александр Балчыырактың, ол-ла кудумчунуң 13, 15 дугаарлыг бажыңнарны Рустам Ооржактың тудуг бригадалары кылган. «Капстрой» КХН Хайыракан сумузунда 6 дугаар линия кудумчузунда 4 бажыңны тудуп дооскан. «2021 – 2022 чылдарда Тыва Республикага кем-херек үүлгедиишкинин болдурбас болгаш хөй-ниитиниң чурумун хандырары» деп ТР-ниң Чазааның 581 дугаарлыг доктаалында программаны боттандырары-биле бо чылын полицияның участок төлээлеринге чурттаар хөй квартиралыг бажыңнар тудуу эгелээн.

Бай-Тайга кожууннуң Шуй сумузунда полицияның участок төлээзинге чурттаар бажыңны хүлээнип алган организация – «Бастион» КХН тудуп турар. Август 25-тиң көргүзүү-биле, тудуг ажылдары 40 хуу кылдынган. Бажыңның ханаларын тудуп үндүрген, девискээрин долгандыр херимнээн, арыгланыр черни кылган, чырыдылга кожар чагыларны тургускан. Тудуг ажылдарын хүлээдир хуусаазы 2022 чылдың декабрь 30.

Ол-ла тудуг организациязы Кызыл хоорайның Вавилин ээтпээнде база бир бажың тудуп турар. Ол черниң полиция участогунуң төлээзинге чурттаар оран-саваның тудуу 65 хуу күүсеттинген.

Бо хүнде тудугнуң таваан, ханаларын, кирер эжиин тургускаш, өрээлдээш, ханаларын дескилээш, иштики эжиктерни салган, бажыңның мурнуу чартыын демир черепицалар-биле шыпкан, электри удазыннарын кошкан. Бо бажыңны доозар хуусаазы база-ла бо чылдың төнчүзүнге чедир.

А. СОЯН.
Чуруктарны ТР-ниң Тудуг яамызының социал четкиде арынындан алган.