Тываның Баштыңы Владислав Ховалыг Россия Федерациязының тудуг болгаш коммунал ажыл-агый сайыды Ирек Файзуллин-биле ужурашкан.
2 хуулуг чиигелделиг ипотека программазының хуусаазын регионга узадырының дугайында айтырыгны Россияның Президентизи Владимир Путинниң мурнунга тургускаш, деткимчени алган болганда, моон соңгаар бистиң сорулгаларывыс дугайында шыңгыызы-биле чугаалажып болур апарганда, чиигелделиг ипотека программазының хуусаазын регионга узадырының аргаларын Ирек Энварович-биле сайгарып чугаалашканын Владислав Ховалыг дыңнаткан.
Чиигелделиг ипотека программазы-биле республикага чуртталга бажыңнарының тудуунга чедип алдынган темпини оожумнатпазын, улам дүргедедирин Владимир Владимирович сүмелээнин Владислав Ховалыг демдеглеп, Тыва Республиканың социал-экономиктиг хөгжүлдезиниң хууда программазының ачызында тудуг материалдарының бүдүрүлгезиниң быжыг баазазын регионда тургусканын айыткан. Кызыл хоорайда чуртталга тудуунуң хемчээли улгатканын барымдаалааш, чуундулар арыглаар дериг-херекселдерни тударының чугулазын Президент-биле чугаалашканын база Владислав Ховалыг дыңнаткан.
«Ол бүгү чедиишкиннер Кызыл хоорайның хөгжүлдезиниң комплекстиг мастер-планын ажылдап кылыры болгаш боттандырары-биле тааржып турар. Бо угланыышкында РФ-тиң Тудуг яамызы-биле сырый ажылдап турар бис. 2024 чылда Санкт-Петербург хоорайга эрткен чурттар аразының экономиктиг форумунга РФ-тиң Чазааның Даргазының оралакчызы Марат Хуснуллинниң деткимчезин база алган болгай бис» – деп, Владислав Ховалыг бодунуң блогунга бижээн.
Ш. МОҢГУШ белеткээн.
Чуруктарны интернеттен алган.
«Шын» №69 2024 чылдың сентябрь 11