Август 8-те Чазактың хуралдаар залынга Тудугжунуң хүнүнге тураскааткан байырлыг хурал болган. Бөгүнгү байдал-биле регионнуң экономиказында шапкыны-биле сайзырап турар адырның алдын холдуг харыысалгалыг болгаш буянныг иштиң шылгараан кижилерин шаңнап-мактаан.
Байырлыг хуралга Тываның Баштыңы Владислав Ховалыг хүннүң кол маадырларынга байырын чедирген. «Национал төлевилелдер боттаныышкыны-биле социал инфраструктураны чаартырының улуг программазын боттандырарынга тудуг адырының улуг салыышкынын демдеглеп турар бис. Чаа ниити билиг школаларының тудугларында силерниң күш-ажылыңарны онзалап демдеглээри чугула. Керээлиг албан черлери өөредилгениң чаа объектилерин тудар чымыштыг графигин чедиишкинниг күүседип турар. Хары угда он ажыг школаны тудуп турарывыс бистиң баштайгы арга-дуржулгавыс-тыр... Амгы үениң шупту механизмнерин ажыглап тургаш, инженер инфраструктуразын, чуртталга бажыңнарын болгаш социал объектилерни чаңгыс аайлап, хоорай тудуунуң, комплекстиг чуртталга тудуунуң планнарын тургузарындан эгелээш, чаа тудуг технологияларын ажыглаарынга чедир боттарының ажылын профессионал болгаш шынарлыг кылып болурун тудугжулар херек кырында бадыткап турар» — деп, Владислав Ховалыг демдеглээн.
Тываның Баштыңының өөрүп четтириишкин бижиктерин Тыва Республикага тудуг адырын сайзырадырынга киирген үлүг-хуузу дээш «ЯППИ» КХН-ниң тудуг участогунуң ажылчыны Константин Юрченкога, «ЯППИ» КХН-ниң директору Валерия Сарыгларга, «Трансстрой» КХН-ниң тудуг болгаш монтаж ажылдарының мастери Виталий Бондарчукка, «Восток» КХН-ниң тудуг болгаш монтаж ажылдарының мастери Анатолий Санаага, «Элита» КХН-ниң дашчызы Давид Зурначянга, «Өлчей» тускай тудугжу» КХН-ниң кран машинизи Мерген Сувакка, «Тыва Республиканың Күрүнениң тудуг экспертизазының эргелели» күрүнениң автономнуг албан чериниң эксперди Ирина Чихачевага, «Элита» КХН-ниң бетончузу Манвел Мартикянга, «Регионстрой» тускай тудугжу» КХН-ниң чиңгине директору Эдуард Иргитке, «Тувастрой» акционерлиг ниитилелдиң каңнакчызы Алдын-Даш Сатка тывыскан.
Тываның Баштыңының Хүндүлел бижии-биле Тыва Республикага тудуг адырын сайзырадырынга киирген үлүг-хуузу дээш «Өлчей» тускай тудугжу» КХН-ниң чиңгине директорунуң капитал тудуг талазы-биле оралакчызы Ахмед Ондар, «Восток» КХН-ниң чиңгине директорунуң оралакчызы Антон Русских, «Тувастрой» акционерлиг ниитилелдиң каңнакчызы Айбек Хумбун шаңнатканнар.
Тыва Республикага тудуг адырын сайзырадырынга киирген улуг ачы-хавыяазы дээш «Тыва Республиканың алдарлыг тудугжузу» деп хүндүлүг атты «Элита» КХН-ниң директору Ваан Андрасянга тывыскан.
Тывада, шынап-ла, тудуг адыры сөөлгү чылдарда улуг сайзыралды ап, школалар, уруглар садтары, көдээ культура бажыңнары, ФАП-тар хөйү-биле туттунуп турар. Чиигелделиг ипотека программазы-биле чуртталга бажыңнарын база хөйнү тудуп, ажыглалче киирип турар. Бо талазы-биле бистиң республикавыс Россияның регионнарының бажында чоруп турар. Оон аңгыда «Тываның тудуг техникуму» «Профессионалитет» деп федералдыг төлевилелдиң тиилекчизи болган. Келир үениң тудугжулары сентябрь 1-ден эгелеп чаа өөредилге программазы-биле чаарттынган дериг-херекселдерлиг өөредилге кабинеттеринге, мастерскаяларга, лабораторияларга 15 янзы ажылчын зоналыг өөредилге-бүдүрүлге комплекизи-биле чүмненген бедик шынарлыг билиглер-биле чепсегленир.
Бүгү назынын тудуг адырынга өргүп каан хоочуннарга, бо хүнде ажылдап чоруур шевер ишчилерге Тудугжу хүнү-биле «Шынның» редакциязы байыр чедирип тур.
Надежда КУУЛАР.
Буян Ооржактың тырттырган чуруу.
“Шын” №31 2025 чылдың август 14