Барыын-Хемчик кожууннуң Кызыл-Мажалык сумузунда улуг стадионнуң тудуу эгелээн. Ол дугайында ТР-ниң Баштыңы Владислав Ховалыг социал четкиде бодунуң хууда арнында бижээн.
«Республикавыстың улуг кожууннарының бирээзи Барыын-Хемчик сентябрьда 100 чыл оюн демдеглээр. Тус черниң чонунга белек кылдыр Кызыл-Мажалык сумузунда 1000 олуттуг улуг стадионнуң тудуун эгелей берген бис.
Стадионга бут бөмбүү ойнаар шөл кылымал шывыглыг болур. Спортчу хемчеглер болгаш улуг маргылдаалар эрттиреринге эптиг байдалдар тургустунар. Трибуналар тургузар, бут бөмбүүнүң болгаш маңнаар шөлдерниң девискээрин дескилээр ажылдар амгы үеде чоруп турар.
Тус черниң удуртулгазы болгаш идепкейжилери-биле ужуражылга база болду. Кожууннуң хөгжүлдезинге болгаш чурттакчыларның амыдыралының деңнелин бедидеринге хамаарышкан айтырыгларны, санал-оналдарны сайгарып чугаалаштывыс. Школачылар көдээ ажыл-агыйга хамаарышкан билиглерни болгаш арга-дуржулгаларын алыр кылдыр, Шекпээр ортумак школазынга көдээ ажыл-агый угланыышкынын ажыдар дугайында солун санал киирди. Бо чылын көдээ ажыл-агый класстарын ажыдарын планнап турар. Барыын-Хемчик кожуун шагда-ла көдээ ажыл-агыйы-биле, мал ажыл-агыйы-биле алдаржаан кожуун болганда, оларның саналын чөптүг деп санап тур мен. Көдээ ажыл-агыйны хөгжүдери чугула» – деп, ол чугаалаан.
Бистиң корр.
Чиңгис СААЯНЫҢ тырттырган чуруктары.
2025 чылдың август 28 “Шын” №33